Móasigð

Móasigð
Móasigð með bauka í Tírol í Austurríki.
Ástand stofns
Ekki metið (IUCN)
Vísindaleg flokkun
Ríki: Plöntur (Plantae) Fylking: Baukmosar (Bryophyta) Flokkur: Hnokkmosaflokkur (Bryopsida) Ættbálkur: Faxmosabálkur (Hypnales) Ætt: Rytjamosaætt (Amblystegiaceae) Ættkvísl: Sanionia Tegund: Móasigð (S. uncinata)
Tvínefni
Sanionia uncinata (Hedw.) Loeske

Móasigð (fræðiheiti: Sanionia uncinata) er algeng mosategund af rytjamosaætt.

Útlit og einkenni

Móasigð vex upprétt og verður 3,5-10 cm há og lítillega greinótt. Laufin eru 3 mm löng og vaxa í kröppum boga sem nær yfirleitt í heilan hring.

Öll lauf móasigðar snúa í sömu átt á stönglinum. Í fljótu bragði getur móasigð því líkst mosum af ættkvíslunum Drepanocladus og Warnstorfia sem hafa einnig lauf sem snúa aðeins í eina átt en móasigð greinist auðveldlega frá þessum ættkvíslum á því að hún hefur grænlita sprota og lauf hennar eru mjög mjó, bogin í heilan hring og með fellingum. Móasigð vex sömuleiðis yfirleitt á þurrari stöðum en þessar ættkvíslir.

Móasgið líkist einnig brekkusigð (S. orthothecioides) en brekkusigð hefur færri og óreglulegri greinar, meiri fellingar á blöðunum, myndar lausvaxna mosabletti og ber sjaldan bauka. Móasigð sem vex á trjám getur í fljótu bragði minnt á Hypnum-tegundir en móasigð hefur lengri blöð en Hypnum-tegundir, fellingar og miðstreng á blöðunum.

Útbreiðsla og búsvæði

Móasgið er með algengustu mosategundum á Íslandi. Hún finnst í skóglendi, mólendi, á veggjum, trjábolum, klettum og uppi á þúfum í mýrlendi. Móasigð vex gjarnan milli gangstéttarhellna og hún var meðal fyrstu mosategunda til að nema land í fuglavarpinu í Surtsey eftir að eyjan myndaðist.

Móasigð er með algengustu mosum í 32 af 64 landvistgerðum á Íslandi. Meðal þeirra eru fjöldi vistgerða sem njóta sérstakrar verndar samkvæmt Bernarsamningnum.

Myndir

• 
  Sigðarlaga blöð móasigðar.
• 
  Fellingar á blaði móasigðar.
• 
  Lokaðir baukar.