Jón Kr. Ólafsson
Jón Kr. Ólafsson | |
|---|---|
 Jón Kr. Ólafsson söngvari | |
| Upplýsingar | |
| Fæddur | Jón Kr. Ólafsson 1940 |
| Störf | Söngvari |
| Hljóðfæri | Rödd |
Jón Kristján Ólafsson (fæddur á Bíldudal 22. ágúst 1940, í húsi sem nefnt var Nes) er íslenskur söngvari.
Foreldrar hans voru Sigurósk Sigurðardóttir (f. 1900, d. 1964) og Ólafur Jóhann Kristjánsson (f. 1898, d. 1943). Fyrstu skref sín sem söngvari steig Jón Kr. í kirkjunni á Bíldudal hjá sóknarprestinum, séra Jóni Kr. Ísfeld. Fimmtán ára var hann kominn í kór kirkjunnar sem hann svo stýrði frá sextánda ári. Kórstarfi sinnti Jón Kr. fram undir aldamótin síðustu.
Jón Kr. gerðist poppari 1962 er hann gekk til liðs við hina rómuðu hljómsveit Facon. Það samtarf entist ein sjö ár og lauk 1969 með hinu vinsæla lagi: „Ég er frjáls“. Þá flutti hann sig um set til Reykjavíkur og söng um nokkurra ára skeið á skemmtistöðum svo sem Hótel Borg og Hótel Sögu. Árið 1983 gáfu SG-hljómplötur svo út stóra plötu með Jóni Kr. þar sem hann syngur einsöngslög við undirleik Ólafs Vignis Albertssonar. Um þá plötu sagði Árni Johnsen í grein í Morgunblaðinu:
- „Í gullabúi íslenskrar menningar er margur gimsteinn frá náttúrunnar hendi og einn af þeim er Jón Kr. Ólafsson frá Bíldudal. Ljóðasöngvari af guðsnáð með fallega rödd og mikla smekkvísi í lagavali, en á nýútkominni hljómplötu hans frá SG hljómplötum syngur hann kunn íslensk einsöngslög. Jón Kr. hefur þétta og fagra rödd sem hann beitir listilega án þess að hafa fengið sérstaka skólun í heimi tónlistarskólanna.“[1]
Útgefið efni[breyta | breyta frumkóða]
- Facon - fjögurra laga plata með hinu kunna lagi Ég er frjáls eftir Pétur Bjarnason sem kom út árið 1969 hjá SG - hljómplötum
- Ljúfþýtt lag - tólf laga LP-plata sem SG - hljómplötur gaf út árið 1983
- Kvöldkyrrð - kom út árið 1997
- Liðnar stundir - kom út árið 1998
- Vesturljós - safndiskur með lögum vestfirskra tónlistarmanna sem kom út 2002
- Pottþétt hinsegin - safndiskur í Pottþétt-seríunni sem kom út 2002, þar syngur Jón Kr. gamla Facon lagið Ég er frjáls.
- Haustlauf - kom út árið 2003. Tólf lög við undirleik landsþekktra tónlistarmanna. Upptökumaður: Gunnar Smári Helgason. Útg. Jón Kr. Ólafsson
Neðanmálsgreinar[breyta | breyta frumkóða]
- ↑ Melódíur minninganna bls. 103. Vestfirska forlagið.