ISNET93
ISNET93 (eða ISN93) er viðmiðunarhnitakerfi vegna GPS-mælinga sem tekið var upp fyrir Ísland af Landmælingum Íslands árið 1993. Kerfið er hornsönn Lambert-keiluvörpun. Mælikvarði vörpunarinnar er 1:1 á breiddargráðunum 64°15' og 65°45' norður. Skurðpunktur ásanna er hornréttur í 65° norður og 19° vestur, og hefur sá skurðpunktur hnitin (500000, 500000), gefið upp á hnitaforminu (norður, austur). Hnitin eru í metrum talin og fara minnkandi til vesturs og suðurs.
Viðmiðunarhnitakerfið byggist á jarðmiðjukerfinu ITRF93.6, sporvölunni GRS-80 og niðurstöðum GPS-mælinga sem framkvæmdar voru árið 1993. Þetta þýðir að Z-ás kerfisins fellur saman við snúningsás jarðar, en X- og Y-ásarnir spanna miðbaugsflötinn. X-ásinn liggur í fleti Greenwich-núllbaugsins, en Y-ásinn er hornréttur á X-ásinn til austurs. GPS-mælingarnar fóru fram á 119 mælistöðvum sem mynda ÍSNET93, og er þeim dreift um allt land.[1] Jarðrek má greina með því að skoða tilfærslu þessarra punkta frá upphaflegum mæligildum, og sökum jarðreks og annarra jarðfræðilegra og stjarnfræðilega þátta þarf að endurnýja grunnstöðvanetið á nokkurra ára fresti. Næsta íslenska grunnstöðvanetið eftir ISNET93 er ISNET05.[heimild vantar]