Hornvík

Hornvík er íslensk vík á Hornströndum sem liggur á milli Hælavíkurbjargs og Hornbjargs. Áður voru þar 3 bæir, Horn (í eyði 1946), Höfn (í eyði 1944) og Rekavík bak Höfn (í eyði 1944).

Síðustu ábúendur í Hornvík[breyta | breyta frumkóða]

Á Horni bjuggu síðast Stígur Haraldsson og Kristinn Plató Grímsson, þeir fluttu þaðan 1946.
Í Höfn bjó síðast Sumarliði Betúelsson en á undan honum faðir hans Betúel Betúelsson. Sumarliði flutti frá Höfn 1944.
Í Rekavík bak Höfn bjó síðast Sigurður Hjálmarsson, hann flutti þaðan 1944.

Hjónin Jón Þorkell Sigmundsson og Hulda Margrét Eggertsdóttir bjuggu á Horni 1951-1952.^[1]

Landlýsing[breyta | breyta frumkóða]

Austan víkurinnar rís Hornbjarg en að vestan Hælavíkurbjarg en þessi tvö björg eru ásamt Látrabjargi stærstu fuglabjörg á Íslandi. Milli Hælavikurbjargs og Rekavíkur er Hvannadalur og Rekavíkurfjall. Upp af Rekavík er Atlaskarð en um það liggur gönguleið yfir í Hælavík og Hlöðuvík. Milli Rekavíkur og Hafnar er fjallið Darri með Einbúa. Út í Rekavík gengur Tröllkambur.

Í sunnaverðri víkinni eru Hafnarskarð, en þar liggur gönguleið í Veiðileysufjörð, Tindaskörð, Ranglaskarð, um það er farið í Lónafjörð, og Breiðaskarð við Snók. Að austanverðu eru Kýrskarð, um það er farið í Látravík, Hestskarð og Almenningaskarð, en þar einnig gönguleið í Látravík.

Norður af Almenningaskarði Innstidalur og upp af honum eru Harviðrisgjá, Eilífstindur og Kálfatindur. Vestan við Kálfatinda er Miðdalur og upp frá honum eru Jörundur, Svaðaskarð og Miðfell. Vestan við Miðfell er Ystidalur og frá honum gengur Horn.

Í víkina falla margar ár og lækir en þessar eru helstar talið frá Höfn: Víðirsá, Torfdalsá, Selá, Gljúfurá, Kýrá og Drífandi eða Bunulækur. Árnar sameinast í eitt vatnsfall á láglendinu og heitir það Hafnarós.

Við Höfn í Hornvík er nú þjónustuhús landvarðar á Hornströndum.