Hákon Rafn Valdimarsson

Hákon Rafn Valdimarsson
Upplýsingar
Fullt nafn	Hákon Rafn Valdimarsson
Fæðingardagur	12. október 2001 (2001-10-12)
Fæðingarstaður	Ísland
Hæð	193 cm
Leikstaða	Markmaður
Núverandi lið
Núverandi lið	Brentford
Yngriflokkaferill
	KR, Grótta
Meistaraflokksferill1
Ár	Lið	Leikir (mörk)
2017-2021	Grótta	65 (0)
2021-2024	IF Elfsborg	48 (0)
2024-	Brentford FC	1 (0)
Landsliðsferill2
2018 2019 2019-2021 2022-	Ísland U-18 Ísland U-19 Ísland U-21 Ísland	1 (0) 1 (0) 8 (0) 20 (0)
1 Leikir með meistaraflokkum og mörk talið í aðaldeild liðsins og síðast uppfært des. 2024. 2 Landsliðsleikir og mörk uppfærð sept 2025.

Hákon Rafn Valdimarsson (f. 13 október 2001) er íslenskur knattspyrnumaður sem spilar sem markmaður fyrir Brentford FC og íslenska landsliðið. Hákon er dýrasti markvörður sem hefur verið seldur úr sænsku úrvalsdeildinni.

Yngriflokkaferill

Hákon æfði bæði handknattleik og knattspyrnu sem barn og lék sem útileikmaður í báðum íþróttum með KR. Þegar Hákon var 13 ára hætti hann í knattspyrnu til að einbeita sér að handknattleiknum í Gróttu. Tveimur árum síðar vantaði markmann í þriðja flokk hjá Gróttu. Þar sem ekki var mikið val af markmönnum ákvað Hákon að freista gæfunnar og það val gekk. Árið 2017, þegar hann var orðinn 16 ára, vantaði varamarkmann í meistaraflokkinn og hann var kallaður til liðs.

Meistaraflokksferill

Grótta

Hákon hóf meistaraflokksferil sinn með Gróttu árið 2017 þegar það vantaði varamarkmann. Hann þreytti frumraun sína í síðasta leik 1. deildar tímabilið 2017 þegar Grótta, sem hafði þegar fallið, tapaði 2–1 fyrir Leikni. Hákon lék síðan í 15 af 22 leikjum 2. deildar tímabilið 2018 þegar Grótta hafnaði í öðru sæti og fór aftur upp í 1. deild. Á tímabilinu 2019 lék Hákon alla 22 leiki Gróttu þegar liðið varð meistari í 1. deild og komst liðið í efstu deild í fyrsta sinn. Árið 2020 lék hann alla 18 leiki Gróttu þegar liðið féll aftur niður í 1. deild. Þann 30. apríl 2021 var tilkynnt að Hákon hefði skrifað undir samning við sænska úrvalsdeildarliðið IF Elfsborg og myndi ganga til liðs við þá um sumarið. Hákon lék níu leiki fyrir Gróttu á fyrri hluta tímabilsins 2021 áður en hann gekk til liðs við Elfsborg í júlí.

IF Elfsborg

Þann 30. apríl 2021 gekk Hákon í raðir IF Elfsborg í Svíþjóð. Þann 1. október 2021 þreytti Hákon frumraun sína í sænsku úrvalsdeildinni með Elfsborg í 1–0 sigri gegn IFK Gautaborg og lék í kjölfarið í næstu fjórum leikjum. Hákon var á bekknum fyrri hluta tímabilsins 2022 áður en honum var gefið tækifæri til að byrja í 1–0 tapi gegn Kalmar FF þann 24. júlí 2022. Í næsta leik var hann á bekknum, en fékk síðan aftur tækifæri til að byrja í 1–1 jafntefli gegn Mjällby AIF og festi sig í kjölfarið í sessi sem byrjunarliðsmaður. Hákon byrjaði alla leiki nema einn á tímabilinu 2023, en var rekinn af velli á 29. mínútu í 1–0 tapi gegn IFK Värnamo þann 2. september 2023. Hann varð markmaður tímabilsins í sænsku úrvalsdeildinni 2023 þegar hann fékk aðeins 22 mörk á sig í 29 leikjum og hélt hreinu 14 sinnum.

Brentford

Þann 26. janúar 2024 skrifaði Hákon undir samning við enska úrvalsdeildarfélagið Brentford til júní 2028 fyrir uppgefna upphæð upp á 2,6 milljónir punda og varð dýrasti markvörður sem hefur verið seldur úr sænsku úrvalsdeildinni. Hann spilaði sinn fyrsta leik með Brentford í deildarbikarleik gegn Colchester United þar sem hann varði vítaspyrnu. Hann spilaði fyrsta leik sinn með Brentford gegn Brighton & Hove Albion í úrvalsdeildinni í desember 2024 þegar aðalmarkvörðurinn Mark Flekken meiddist.

Landsliðsferill

Þann 12. nóvember 2021 var Hákon kallaður inn í íslenska A-landsliðið í fyrsta sinn þegar Patrik Gunnarsson þurfti að draga sig úr hópnum vegna meiðsla. Hann lék sinn fyrsta A-landsleik þann 12. janúar 2022 þegar hann kom inn á í vináttulandsleik gegn Úganda í hálfleik. Leiknum lauk með 1–1 jafntefli og hann hélt hreinu. Með þessum áfanga varð hann fyrsti Gróttumaðurinn til að spila A-landsleik.