Grettissund

Drangey

Grettissund er það afrek nefnt þegar Grettir Ásmundarson synti frá Drangey að Reykjanesi á Reykjaströnd. Nú er það kallað Grettissund þegar synt er úr Uppgönguvík í Drangey, sem er um 7,1 km, en Drangeyjarsund þegar synt er úr fjöru sunnan til á eynni, sem er stysta vegalengd úr eyju í land, samtals 6,6 kílómetrar.

Sundið þótti mikið þrekvirki en margir litu á það sem ýkjusögu þar til menn syntu sömu leið í byrjun tuttugustu aldar. Upphaf þess að menn reyndu við Grettissund var sú hvatning sem ungir menn fengu við að heyra af afreki Benedikts G. Waage þegar hann synti í land frá Viðey árið 1914.

Lýsing Grettis sögu

Sundinu er þannig lýst í Grettis sögu:

Býst Grettir nú til sunds og hafði söluvoðarkufl og gyrður í brækur. Hann lét fitja saman fingurna. Veður var gott. Hann fór að áliðnum degi úr eyjunni. Allóvænlegt þótti Illuga um hans ferð. Grettir lagðist nú inn á fjörðinn og var straumur með honum en kyrrt með öllu. Hann sótti fast sundið og kom inn til Reykjaness þá er sett var sólu. Hann gekk til bæjar að Reykjum og fór í laug því honum var orðið nokkuð kalt. Bakaðist hann lengi í lauginni um nóttina og fór síðan í stofu. Þar var mjög heitt því að eldur hafði verið um kveldið og var lítt rokin stofan. Hann var móður mjög og sofnaði fast. Lá hann þar allt á dag fram.“

— Grettis saga, kafli 75.

Þeir sem synt hafa Grettissund eða Drangeyjarsund

Alls hafa 20 sundmenn synt Grettissund eða Drangeyjarsund

Dagsetning	Sundmaður		Sundtími	Hitastig sjávar	Athugasemd
1030	Grettir Ásmundarson	Grettissund	Ekki vitað	Ekki vitað	Fyrstur til að synda, en við hann er sundið kennt. Hann smurði sig með fuglafeiti og einnig er vitað að hann var í einhverjum hlífðarfatnaði (skv. Grettissögu). Lagði hann af stað síðla dags og náði landi er sól var sest.
31. júlí 1927	Erlingur Pálsson	Drangeyjarsund	4 klst. og 24 mín.	11°c	Erlingur lagði til sunds frá suðurodda Drangeyjar kl. 5,37 síðdegis sunnudaginn 31. júlí og tók land á Hrossavíkurnefi innan við Reykjaá. Hann synti þol-skriðsund alla leið, en hvíldi sig eitthvað 6 sinnum á bringusundi, 1-2 mín. í senn.
28. júlí 1936	Pétur Eiríksson	Grettissund	5 klst. og 19 mín.	9°c	Smurður með 9 kílóum af lanolini. Þá fór hann í ermalausa ullarskyrtu næst sér, síðan í vaxdúksbol þar utan yfir og yst í ullarsundbol sem náði upp í háls og niður á mið læri. Hann klæddist einnig háum sokkum sem saumaðir voru fastir við bolinn. Vaxdúkshettu hafði hann á höfðinu og gúmmíhettu þar utan yfir, hlífðargleraugu og svo hanska á höndum. Auk þessa hafði hann sokkboli á lærum og upphandleggjum.
6. ágúst 1939	Haukur Einarsson	Grettissund	3 klst. og 20 mín.	9°c	Smurður feiti og í ullarsamfestingi.
13. júlí 1957	Eyjólfur Jónsson	Grettissund	4 klst. og 45 mín.	Ekki vitað	Ósmurður
28. júní 1959	Eyjólfur Jónsson	Drangeyjarsund	4 klst. og 20 mín.	7,7°c	Smurður feiti
3. september 1961	Axel Kvaran	Drangeyjarsund	3 klst. og 13 mín.	10°c	Smurður feiti. Synti úr landi í Drangey.
24. ágúst 1994	Kristinn Einarsson	Drangeyjarsund	5 klst. og 40 mín.	9,2°c	Smurður með Lanolíni.
6. ágúst 1998	Kristinn Magnússon	Grettissund	2 klst. og 10 mín.	9,7°c	Synti í Neophrene galla
20. júlí 2002	Kristinn Magnússon	Drangeyjarsund	2 klst. og 30 mín.	8°c	Synti ósmurður en með Neophrene hettu niður f. höku og neophrene sundskýlu að hnjám
16. ágúst 2008	Benedikt Hjartarson	Drangeyjarsund	2 klst. og 36 mín.	10°c	Synti í Swimskin keppnisgalla
8. ágúst 2009	Heimir Örn Sveinsson	Grettissund	1 klst. og 36 mín.	11-12°c	Synti í Neophrene galla frá toppi til táar
8. ágúst 2009	Þorgeir Sigurðsson	Drangeyjarsund	2 klst. og 21 mín.	11-12°c	Smurður með Lanolini.
8. ágúst 2009	Heiða Björk Jóhannsdóttir	Drangeyjarsund	2 klst. og 25 mín.	11-12°c	Smurð með Lanolini og með teypaða fingur
8. ágúst 2009	Þórdís Hrönn Pálsdóttir	Drangeyjarsund	2 klst. og 36 mín.	11-12°c	Smurð með Lanolini og með teypaða fingur
15. ágúst 2009	Benedikt S. Lafleur	Grettissund	3 klst. og 25 mín.	10°c
15. ágúst 2009	Sarah-Jane Emily Caird	Grettissund	3 klst. og 11 mín.	10°c
14. ágúst 2010	Sigurjón Þórðarson[3]	Drangeyjarsund	2 klst. og 5 mín.	10°c
14. ágúst 2010	Sarah-Jane Emily Caird	Drangeyjarsund	2 klst. og 45 mín.	10°c
5. september 2010	Árni Þór Árnason	Drangeyjarsund	2 klst. og 42 mín.	10,5°c
28. júlí 2012	Birna Hrönn Sigurjónsdóttir	Drangeyjarsund	2 klst. og 27 mín	10°c
5. ágúst 2012	Benedikt S. Lafleur	Grettissund	Tæpar 5 klst.	11-12°c
28. júlí 2014	Jón Kristinn Þórsson	Drangeyjarsund	3 klst.	10-11°c	Smurður með lanolínblöndu.
12. ágúst 2017	Sigrún Þuríður Geirsdóttir	Drangeyjarsund	3 klst. og 29 mín.	9,5-10-5°c
12. ágúst 2017	Harpa Hrund Berndsen	Drangeyjarsund	4 klst. og 15 mín.	9,5-10-5°c

Tengt efni

• Grettislaug
• Viðeyjarsund
• Eyjasund

Tenglar

• Grettissund Erlings Pálssonar 31. júlí 1927; grein í Morgunblaðinu 1977