Byggðasafn Dalvíkurbyggðar

Húsið Hvoll á Dalvík þar sem byggðasafnið var frá 1987 til 2023.

Byggðasafn Dalvíkurbyggðar var opnað á Dalvík 12. desember 1987. Safnið er þrískipt; byggðasafn, náttúrgripir og persónusaga. Safnstjóri er Björk Hólm. Safnið var staðsett í húsinu Hvoli frá stofnun, en bærinn keypti húsið árið 1985 með það fyrir augum að stofna þar byggðasafn. Árið 2023 kom í ljós að húsið kallaði á dýrar endurbætur. Árið eftir var húsið sett á sölu. Síðan þá hefur byggðasafnið ekki haft eigið sýningarhúsnæði.

Safnið

Munir safnsins eru flestir frá Dalvík, Svarfaðardal og Árskógsströnd. Þar eru meðal annars áhöld og innanstokksmunir frá fyrri tíð sem vitna um þróun verkmenningar í sveitarfélaginu og sögu byggðarinnar. Einnig eru þar skrautmunir af ýmsu tagi gerðir af hagleiksfólki af svæðinu. Eftirmynd af Upsakristi, hinni fornu róðu úr Upsakirkju, er þar til sýnis.

Í náttúrugripasafninu er fjöldi uppstoppaðra íslenskra fugla og dýr úr undirdjúpum sjávar. Einnig eru þar spendýr t.d. ísbjörn. Auk þess er grasasafn, skeljasafn, eggja- og steinasafn. Stórt kort af Friðlandi Svarfdæla sýnir hvaða fuglar verpa þar eða hafa viðkomu á svæðinu.

Hluti safnsins er tileinkaður minningu þekktra einstaklinga úr byggðinni; Jóhanns Svarfdælings, Kristjáns Eldjárns forseta Íslands, bræðranna Jóns, Kristjáns og Hannesar Vigfússona frá Litla-Árskógi auk sr. Friðriks Friðrikssonar æskulýðsleiðtoga.