Bókhlöðustígur
Bókhlöðustígur er brött gata í miðbæ Reykjavíkur sem nær frá Þingholtsstræti niður að Lækjargötu. Laufásvegur endar í norðri við Bókhlöðustíg, sömuleiðis Miðstræti. Við Bókhlöðustíg stendur einn elsti steinbærinn í Reykjavík og nefnist Stöðlakot. Bókhlöðustígur dregur nafn sitt af bókhlöðubyggingunni Íþöku við Menntaskólann í Reykjavík.
Við Bókhlöðustíg var Frímerkjahúsið og þar var lengi starfræktur söluturninn Hallinn.
Við Bókhlöðustíg stendur ein af spennistöðvum Rafmagnsveitu Reykjavíkur. Þetta er ein af sjö spennistöðvum sem voru byggðar í Reykjavík til að taka við rafmagni frá Elliðaárstöðinni sem tók til starfa árið 1921.
