Þorvaldur Lúðvík Sigurjónsson

Þorvaldur Lúðvík Sigurjónsson (f. 15. júní 1971) er íslenskur viðskiptafræðingur og bankamaður. Þorvaldur er þekktastur fyrir að hafa verið forstjóri fjárfestingarbankans Saga Capital frá stofnun bankans 2006 til 2011.

Ævi

Þorvaldur var í stjórn SUS á sínum yngri árum auk þess að vera í ræðuliði MA öll sín ár við skólann. Þá var hann einig í ræðuliði Heriot-Watt háskóla í Edinborg á námsdvöl sinni í Skotlandi. ^[1] Hann útskrifaðist með BA (Hons.)-gráðu í alþjóðaviðskiptum og tungumálum frá Heriot-Watt háskóla í Edinborg, Skotlandi, árið 1995.

Að námi loknu, árið 1995 starfaði Þorvaldur hjá Sölumiðstöð hraðfrystihúsanna í Englandi í eitt ár. Að því loknu vann hann hjá Kaupþingi Norðurlands, en flutti sig þaðan til Kaupþings hf. í Reykjavík. Umskiptin tengdust kaupum Sparisjóðs Norðlendinga á meirihluta hlutafjár í Kaupþingi Norðurlands. ^[2]

Hjá Kaupþingi í Reykjavík setti Þorvaldur á stofn deild eigin viðskipta bankans sem þá hóf að sinna viðskiptum með verðbréf fyrir eigin reikning bankans (e: Propreitary trading). Hann gegndi stöðu forstöðumanns Markaðsviðskipta/miðlunar og síðar framkvæmdastjóra Eigin viðskipta til ársins 2006, en hið sama ár stofnaði Þorvaldur fjárfestingarbankann Saga Capital ásamt samstarfsmönnum frá Kaupþingi og hópi fjárfesta. Þorvaldur sagði upp stöðu sinni sem forstjóri Saga Fjárfestingarbanka í apríl 2011, í kjölfar fjölmiðlaumræðu um persónuleg fjármál hans og aðkomu að viðskiptum sem voru til rannsóknar hjá Sérstökum saksóknara.

Þorvaldur er best þekktur innan íslensks viðskiptalífs fyrir að hafa þróað s.k. eigin viðskipti bankastofnana á Íslandi (proprietary trading) og að hafa komið bankanum Saga Fjárfestingarbanka í gegnum fjármálakrísuna frá 2008.^{[heimild vantar]} Þorvaldur hefur réttarstöðu grunaðs manns í rannsóknum Sérstaks saksóknara á viðskiptum Kaupþings og Glitnis í tengslum við viðskipti með skuldabréf fjárfestingarfélagsins Stím.^[3]

Í janúar 2012 var Þorvaldur ráðinn framkvæmdastjóri Atvinnuþróunarfélags Eyjafjarðar (AFE). Ráðningin var umdeild, en stjórnarformaður Atvinnuþróunarfélagsins, Geir Kristinn Aðalsteinsson, bar við að Þorvaldur hefði verið hæfastur 37 umsækjenda um stöðuna, og að hann væri saklaus uns dæmdur sekur. Í viðtali við RÚV 3. janúar 2012 sagði Geir Kristinn að það væri ótækt að menn væru dæmdir í "skóggang" þó þeir væru til rannsóknar hjá Sérstökum saksóknara:

	„„Maðurinn er saklaus og hann er hæfastur, uns sekt hans er sönnuð. Það gæti komið í ljós eftir einhver ár að hann yrði sakfelldur eða ekki og það verður bara að koma í ljós þegar þar að kemur eða ekki en okkur fannst ekki ástæða til þess að láta það trufla okkur frekar."
	— Geir Kristinn Aðalsteinsson, stjórnarformaður AFE^[4]