Stjórnarskrá Rússlands
Stjórnarskrá Rússlands (rússneska: Конституция России) eru æðstu lög Rússlands sem voru samþykkt af stjórnlagaþinginu 12. desember 1993. Stjórnarskrá Rússlands er nánast óbreytanleg en til þess að breyta henni þarf mikinn meirihluta á þingi og auk þess í mörgum tilfellum, þjóðaratkvæðagreiðslu. Henni hefur þó verið breytt nokkrum sinnum.
Síðast voru gerðar breytingar á stjórnarskránni með stórtækri endurskoðun sem staðfest var í þjóðaratkvæðagreiðslu þann 1. júlí árið 2020. Með breytingunum var hjónaband formlega skilgreint sem samband milli karls og konu og þannig loku skotið fyrir að hjónaband samkynhneigðra verði leyft í Rússlandi með almennum lögum. Jafnframt var embættistíð Vladímírs Pútín Rússlandsforseta núllstillt með breytingunum og möguleikinn því opnaður á að hann bjóði sig fram til endurkjörs í fimmta sinn.[1] Með stjórnarskrárbreytingunum var einnig fært inn ákvæði sem felur í sér viðurkenningu á „forfeðrum sem létu [Rússum] eftir hugsjónir sínar og trú á guði“, bannað var að gera lítið úr framlagi Sovétríkjanna í seinni heimsstyrjöldinni og bannað að leggja til að Rússar láti nokkurn tímann af hendi landsvæði sem þeir ráða yfir (til að mynda umdeild landsvæði eins og Kúrileyjar og Krímskaga).[2]
Tilvísanir[breyta | breyta frumkóða]
- ↑ Dagný Hulda Erlendsdóttir (1. júlí 2020). „Yfirgnæfandi meirihluti samþykkti breytingar Pútíns“. RÚV. Sótt 4. júlí 2020.
- ↑ Kjartan Kjartansson (3. mars 2020). „Pútín vill guð og „hefðbundið" hjónaband í stjórnarskrá“. Vísir. Sótt 4. júlí 2020.