Smáíbúðahverfið

Smáíbúðahverfið er íbúðahverfi í Reykjavík sem afmarkast af Bústaðavegi til suðurs, Miklubraut til norðurs, Háaleitisbraut til vesturs og Byggðaenda milli Miklubrautar/Reykjanesbrautar/Bústaðavegar til austurs. Hlutar hverfisins eru í daglegu tali aðgreindir og austasti hlutinn, næst Bústaðakirkju, er þá oft nefndur Bústaðahverfið, miðhlutinn Réttarholt og nyrsti hlutinn við Rauðagerði kallaður Sogamýri.

Réttarholtsvegur þverar hverfið frá suðri til norðurs og Sogavegur myndar tengingu innan þess frá austri til vesturs.

Almenningssamgöngur eru taldar góðar í Smáíbúðahverfinu, strætisvagnar aka Sogaveg, Miklubraut, Bústaðaveg og Grensásveg en leiðin um Réttarholtsveg hefur nú verið lögð niður.

Réttarholt var áður þekkt kennileiti í Smáíbúðahverfinu og dregur nafn sitt af réttinni sem áður var staðsett í holtinu en er nú horfin. Réttarholtsvegur og Réttarholtsskóli draga enn nafn sitt af réttinni og holtinu. Neðan holtsins til norðurs lá mýrin Sogamýri þar sem áður var bærinn Sogablettur.

Um Borgargerði lá áður tenging til norðurs að Suðurlandsbraut, áður en Réttarholt og Skeiðarvogur voru tengd með umferðarljósum og síðar veglegum mislægum umferðarmannvirkjum sem tengja hverfið við helstu umferðaræðar og verslunarhverfin í Skeifunni og Mörkinni.

Helstu götur smáíbúðahverfisins

• Akurgerði
• Austurgerði
• Ásendi
• Bakkagerði
• Breiðagerði
• Búðagerði
• Básendi
• Byggðarendi
• Grundargerði
• Háagerði
• Heiðargerði
• Hlíðargerði
• Hólmgarður
• Hvammsgerði
• Langagerði
• Litlagerði
• Melgerði
• Mosgerði
• Rauðagerði
• Sogavegur
• Steinagerði
• Teigagerði