Pétur Trúels Tómasson
Pétur Trúels Tómasson, kallaður Pétur skytta, var hirðstjóri eða umboðsmaður hirðstjóra á Íslandi í lok 15. aldar.
Hann var af dönskum eða þýskum ættum, hugsanlega frá Hamborg, og hafði verið við kaupskap á Íslandi og átti hér bú. Eftir því sem Bogi Benediktsson segir í Sýslumannaæfum var hann veginn af þjónum sínum, þegar hann kom úr boði, og höfðu einhverjir Íslendingar sem hötuðust við Pétur keypt þá til verksins.
Kona Péturs var Ástríður, systir Jóns Sigmundssonar lögmanns. Synir þeirra, Hannes og Melkjör, fóru til Hamborgar og settust þar að, Jakob var umboðsmaður í Vestmannaeyjum og dæturnar Guðrún og Marín urðu einnig eftir á Íslandi og var Marín formóðir Jóns Indíafara.
Jón Ólafsson Indíafari segir svo frá í reisubók sinni:
- Pétur Skytta var einn Hamborgari, og var hirðstjóri og búandi hér á landi. Hann átti Ástríði Sigmundsdóttur, sú eð var systir Jóns Sigmundssonar, sá er var afi herra Guðbrands biskups yfir Hólastifti. Pétur átti tvo sonu, Hannes og Melkior og tvær dætur, Marínu og Guðrúnu. Þessi Pétur var veginn af sínum sjálfs tveimur þénurum, sem þar til voru keyptir af nokkrum hérlandsmönnum fyrir einhvers haturs sakir, nær hann gekk úr baði um veturinn á föstu. En hans tveir synir drógu til Hamborgar og tóku mestallan ríkdóm með sér, einkum kvenlegt skart upp á 12 jómfrúr, en þær systur báðar, Marín og Guðrún, urðu hér eftir, og þessi Marín var mín langamma. En af þessum áður sögðu Péturssonum er sögð stór ætt til Hamborgar sé afkomin.
Heimildir
[breyta | breyta frumkóða]- Safn til sögu Íslands. 2. bindi, Kaupmannahöfn 1886.
- Bogi Benediktsson: Sýslumannaæfir, 2. bindi, Reykjavík 1889-1904.
| Fyrirrennari: Ambrosius Illiquad |
|
Eftirmaður: Pétur Kláusson | |||