Líkamsrækt

Hjólreiðar eru vinsæl líkamsrækt.

Líkamsrækt er líkamleg hreyfing af ýmsum toga sem miðar að því að styrkja líkamann, byggja upp þol, og viðhalda heilsu og hreysti. Líkamsrækt byggir á ýmis konar virkni, margvíslegum æfingum og íþróttum.

Hreyfing er almennt skilgreind sem hvers konar vinna beinagrindarvöðva sem eykur orkunotkun umfram það sem gerist í hvíld. Hreyfingu má líka skilgreina út frá fjórum meginþáttum: ákefð (hve erfitt), tíma (hve lengi), tíðni (hve oft), og tegund (hvers konar hreyfing).

Mælt er með því að fullorðnir stundi miðlungserfiða hreyfingu daglega og börn miðlungserfiða og erfiða hreyfingu daglega. Fullorðnir ættu að stunda erfiða hreyfingu að minnsta kosti 2 sinnum í viku og í 20-30 mínútur hvert sinn.

Líkamsrækt minnkar líkurnar á flestum langvinnum sjúkdómum og lífsstílssjúkdómum. Þar má nefna hjartasjúkdóma, háþrýsting, ofþyngd/offitu, sykursýki 2 og þunglyndi. Líkamsrækt dregur úr líkum á að fá heilablóðfall, ristilkrabbamein, og brjóstakrabbamein. Hún hefur jákvæð áhrif á stoðkerfi og andlega líðan.

Tenglar

• Hreyfitorg