Hringurinn

Úr Wikipediu, frjálsa alfræðiritinu
(Endurbeint frá Kvenfélagið Hringurinn)
Jump to navigation Jump to search
Fyrir kvikmynd Friðriks Þórs, sjá Hringurinn (kvikmynd).

Hringurinn er kvenfélag sem var stofnað 26. janúar 1904 í Reykjavík. Í upphafi var markmið félagsins að safna fé til aðstoðar berklaveiku fólki en síðustu áratugi hafa helstu verkefni Hringsins snúið að bættum aðbúnaði veikra barna. Félagið beitti sér fyrir stofnun barnaspítala á Íslandi og er Barnaspítali Hringsins því nefndur eftir félaginu.[1]

Aðdragandann að stofnun Hringsins má rekja til Kristínar Vídalín Jacobson en hún hafði veikst af berklum sem ung stúlka og á meðan hún lá á sjúkrahúsi í Danmörku hét hún því að næði hún heilsu á ný myndi hún leggja sitt af mörkum til bæta aðbúnað fátækra berklasjúklinga. Kristín efndi þetta heit sitt og boðaði til stofnfundar í Iðnó við Vonarstræti í Reykjavík þann 26. janúar 1904. Stofnfélagar Hringsins voru 45 konur en Kristín varð fyrsti formaður félagsins og veitti því formennsku í 39 ár.[2][3]

Hressingarhæli fyrir berklasjúklinga[breyta | breyta frumkóða]

Á fyrstu árum félagsins var helsta verkefni þess að bæta hag fátækra berklasjúklinga. Á þessum árum var mikill skortur á úrræðum fyrir berklasjúklinga og úr varð að Hringskonur settu á laggirnar það sem þá var kallað hressingarhæli fyrir berklasjúklinga og gátu þeir dvalist þar að lokinni sjúkrahúsdvöl eða þangað til fullum bata var náð. Hælið var til húsa í Kópavogi og tók til starfa árið 1926 og var reksturinn í höndum Hringsins allt til ársins 1940 er Hringurinn gaf ríkinu húsnæðið ásamt öllum innanstokksmunum.[1]

Barnaspítali Hringsins[breyta | breyta frumkóða]

Árið 1942 ákváðu Hringskonur að breyta áherslum í starfi sínu og varð velferð sjúkra barna í fyrirrúmi. Hringskonur settu sér það markmið að barnaspítali yrði settur á laggirnar hér á landi. Það reyndist þungur róður en úr varð að sérstök barnadeild var opnuð á Landspítalanum árið 1957. Árið 1965 tók svo Barnaspítali Hringsins til starfa á Landspítalanum. Barnaspítalinn bjó lengi við þröngan húsakost en á 80 ára afmæli Hringsins árið 1984 ákváðu Hringskonur að beita sér að fullum krafti fyrir því að nýr sérhannaður barnaspítali yrði reistur á lóð Landspítalans við Hringbraut og miðaðist starfsemi félagsins að því að afla fjármuna til að draumurinn gæti orðið að veruleika. Markmiðið náðist og á 99 ára afmæli Hringsins þann 26. janúar 2003 var nýtt húsnæði Barnaspítala Hringsins formlega tekið í notkun.

Tilvísanir[breyta | breyta frumkóða]

  1. 1,0 1,1 Minjastofnu.is, „Hressingarhælið í Kópavogi“, (skoðað 16. júní 2019)
  2. Hringurinn.is, „Saga Hringsins“, (skoðað 16. júní 2019)
  3. „Að líkna veikum börnum er eins og að rækta fagurt blóm“, Morgunblaðið, 8. desember 2002, (skoðað 16. júní 2019)