Jack Kevorkian

Jacob „Jack“ Kevorkian

Jacob „Jack“ Kevorkian (26. maí 1928 – 3. juní 2011) var einn áhrifamesti baráttumaður fyrir dánaraðstoð í Bandaríkjunum. Hann var menntaður meinafræðingur og útskrifaðist úr Læknaskóla Michigan árið 1952.

Kevorkian var af armensku bergi brotin. Báðir foreldrar hans voru armenskir innflytjendur. Kevorkian varð heimsfrægur á tíunda áratugnum fyrir það að hafa hjálpað rúmlega 130 veikum einstaklingum að enda líf sitt frá árinu 1990 til ársins 1998. Vegna þessa var hann kallaður „doktor dauði“ í bandarískum fjölmiðlum. Jack Kevorkian hafði ungur að árum mótað með sér þá skoðun að fólk sem væri að upplifa mikinn sársauka vegna veikinda ætti sjálft að geta ákveðið hvenær það myndi deyja.

Árið 1987 byrjaði hann að auglýsa ráðgjöf fyrir mjög veikt fólk sem leitaðist eftir því að deyja. Það var ekki fyrr en árið 1990 sem hann hjálpaði sínum fyrsta sjúklingi að enda líf sitt. Það var kona að nafni Janet Adkins sem hafði verið greind með alzheimer árið 1989. Jack Kevorkian var ákærður fyrir morðið á Adkins, en það voru þó engin lög í Michigan á þessum tíma sem bönnuðu að hjálpa manneskju að enda líf sitt og var því ákæran felld niður seinna það sama ár.

Michigan-ríki svipti Kevorkian lækningaleyfi árið 1991 eftir að hafa gefið honum skýr fyrirmæli um að hann gæti ekki haldið áfram að veita fólki þessa þjónustu.

Árið 1998 lét hann fréttaþáttinn 60 Minutes fá upptöku af því þegar hann sprautaði mann að nafni Thomas Youk með lyfjum sem enduðu líf hans. Kevorkian sprautaði hann sjálfur til þess að hann yrði ákærður. Hann trúði því að hann gæti farið með málið fyrir dóm og sýnt fram á að það sem hann væri að gera væri mannúðlegt en ekki morð.

Kevorkian ákvað að vera sinn eiginn verjandi í réttarhöldunum. Það gekkk ekki vel fyrir hann þar sem hann var ekki lærður í lögfræði og kunni því ekki að flytja mál sitt samkvæmt lögum. Málinu lauk með því að Jack Kevorkian var fundinn sekur og dæmdur í 10 til 25 ára fangelsisvist fyrir morð af annarri gráðu.

Kevorkian afplánaði rúmlega átta ár af dómi sínum. Honum var veitt náðun vegna veikinda og sleppt 1. júní árið 2007. Allt til dauðadags hélt hann áfram að berjast fyrir því að það væri réttur allra einstaklinga að geta ráðið örlögum sínum. Jack Kevorkian lést þann 3. júní árið 2011 eftir þrálát veikindi til margra ára, þá 83 ára gamall.

Tónlistarferill

Kevorkian var djasstónlistarmaður og tónskáld. Svissnesku Exit-samtökin fólu hljómsveitarstjóranum David Woodard árið 1999 að útsetja orgelverk Kevorkian fyrir blásarasveit.

Heimildir

• Fyrirmynd greinarinnar var að hluta til „Jack Kevorkian“ á ensku útgáfu Wikipedia. Sótt nóvember 2012.

  Þetta æviágrip er stubbur. Þú getur hjálpað til með því að bæta við greinina.