Jón Ásgeirsson

Jón Gunnar Ásgeirsson Skúlason (f. 11. október 1928 á Ísafirði, d. 21. nóvember 2025 í Reykjavík) var íslenskt tónskáld. Meðal þekktustu verka hans eru óperurnar Þrymskviða, Galdra-Loftur og Möttulssaga. Hann samdi líka mörg vinsæl sönglög eins og lagið við ljóð Halldórs Laxness, Maístjarnan.

Jón nam við Tónlistarskólann í Reykjavík, framhaldsnám við Konunglega skoska háskólann í Glasgow og Guildhall School of Music í London. Hann varð fyrsti prófessorinn í listgreinum á Íslandi þegar hann var skipaður prófessor í tónlist við Kennaraháskóla Íslands árið 1996.

Jón útsetti og samdi millikafla við lag úr þjóðlagasafni Bjarna Þorsteinssonar árið 1960 og setti það við lausavísur sem eignaðar voru Vatnsenda-Rósu og kallaði Vísur Vatnsenda-Rósu. Lagið varð mjög vinsælt og þekkt í þessari útgáfu. Jóni þótti á höfundarétti sínum brotið þegar lagið var kallað „íslenskt þjóðlag“ og útsetning eignuð öðrum í síðari útgáfum, meðal annars þar sem lagið var notað í kvikmyndinni Tár úr steini árið 1996. Úrskurðarnefnd á vegum STEFs úrskurðaði að Jón ætti stærstan hluta lagsins þótt það byggði á þjóðlagi. Jóni þótti STEF síðan sýna sér lítinn stuðning í málarekstri út af notkun lagsins og sagði sig því úr félaginu.

Jón hlaut riddarakross Hinnar íslensku Fálkaorðu árið 2001 fyrir „störf í þágu lista og menningar“. Hann var útnefndur borgarlistamaður Reykjavíkur árið 1996.