Heinz-Harald Frentzen

Heinz-Harald Frentzen
	Frentzen árið 2006
Fæddur	18. maí 1967 (58 ára); Mönchengladbach, Vestur-Þýskaland
Formúlu 1 ferill
Þjóðerni	Þýskur
Ár	1994-2003
Lið	Sauber, Williams, Jordan, Prost, Arrows
Keppnir	160 (156 ræsingar)
Heimsmeistaratitlar	0
Sigrar	3
Verðlaunapallar	18
Stig á ferli	174
Ráspólar	2
Hröðustu hringir	6
Fyrsta keppni	Brasilíski kappaksturinn 1994
Fyrsti sigur	San Marínó kappaksturinn 1997
Síðasti sigur	Ítalski kappaksturinn 1999
Seinasta keppni	Japanski kappaksturinn 2003
Aðrar mótaraðir
1992, 2008	24 Klukkustundir af Le Mans

Heinz-Harald Frentzen (f. 18. maí 1967) er þýskur ökuþór sem keppti í Formúlu 1 á árunum 1994-2003. Hann endaði í öðru sæti í heimsmeistaramóti ökumanna árið 1997 með Williams og vann þrjár keppnir yfir 10 tímabil.

Keppnisferill

Ýmis mót

Heinz-Harald Frentzen fæddist í þýsku borginni Mönchengladbach. Faðir hans var Þjóðverji, en móðir hans Spánverji. Frentzen var aðeins 13 ára þegar hann hóf keppni í Kart-keppni og varð þýskur unglingameistari ári síðar. Þegar hann var 16 ára kynntist hann Michael Schumacher í heimaborg hins síðarnefnda, Kerpen. Þar hafði Schumacher verið einvaldur í Kart-keppni en Frentzen sigraði hann strax í fyrstu keppni. 1986 hóf Frentzen keppni í atvinnukappakstri, Formúlu Ford 2000. Strax á fyrsta ári náði hann öðru sæti í stigagjöf ökumanna. Tveimur árum síðar varð hörð keppni um fyrsta sætið. Hún endaði á því að Austurríkismaðurinn Karl Wendlingar sigraði en Frentzen og Schumacher urðu saman í öðru sæti. Þessir þrír ökuþórar áttu eftir að etja kappi oftar. 1991 skipti Frentzen yfir í Formúlu 3000 en þar voru hann og Wendlingar á tímabili samherjar.

Formúla 1

1994 tók Frentzen í fyrsta sinn þátt í Formúlu 1 og keppti fyrir Sauber-liðið. Fyrsta mótið hans var Brasilíukappaskturinn og ók hann út af. Seinna á þessu ári létust ökuþórarnir Ayrton Senna og Roland Ratzenberger. Auk þess lenti Wendlinger í hörðum árekstri í Mónakó og lá í dái í nokkrar vikur. Þessir atburðir voru mikið áfall fyrir Frentzen, sem ekki náði miklum árangri hjá Sauber næstu þrjú árin. Williams-liðið bauð honum að taka sæti Senna en hann hafnaði því. 1997 tók hann hins vegar boði Williams og tók þar sæti Damons Hill, sem hafði orðið heimsmeistari með liðinu. Strax á fyrsta ári sínu hjá liðinu tókst honum að landa fyrsta sigri sínum, er hann kom fyrstur í mark í Imola á undan Michael Schumacher og Eddie Irvine. Þetta ár var hans besta í Formúlu 1 en hann náði öðru sæti í stigagjöf ökumanna. Heimsmeistari var samherji hans Jacques Villeneuve. Á næsta ári var ýmsum reglum í Formúlu 1 breytt og reyndist Williams liðið ekki vel í stakk búið til að aðlagast nógu vel. Villeneuve og Frentzen stóðu sig báðir frekar illa. 1999 skipti Frentzen yfir í Jordan-liðið og stóð sig mjög vel. Á því ári náði hann að sigra tvisvar (í Magny-Cours í Frakklandi og í Monza á Ítalíu), einu sinni lenti hann í öðru sæti og einu sinni í þriðja sæti. Þegar uppi var staðið náði hann þriðja sæti í stigagjöf ökumanna, á eftir Mika Häkkinen og Eddie Irvine. Fjögur síðustu ár sín í Formúlu 1 voru ekki sérlega gæfurík fyrir Frentzen. Hann náði á þeim tíma aðeins þrisvar sinnum þriðja sæti. 2001 ók hann fyrir Prost, 2002 fyrir Arrows og 2002-2003 fyrir Sauber. Síðast keppti Frentzen í Japanskappakstrinum 2003.

Önnur mót

2004 keppti Frentzen fyrir Opel í DTM (Deutsche Tourenwagen-Masters), þar sem aðallega er keppt í Þýskalandi á þýskum bílum. Frentzen keppti fyrst fyrir Opel, síðan fyrir Audi.

Persónulegt

Sökum þess að Heinz-Harald Frentzen er með langt og óþjált nafn, er hann oft nefndur HHF.
Frentzen er kvæntur og þrjár dætur. Fjölskyldan býr í Mónakó.

Árangur

Ár	Keppnislið	Fj. keppna	Sigur	2. sæti	3. sæti	Stig	Sæti ökumanna
1994	Sauber	15	-	-	-	7	13.
1995	Sauber	17	-	-	1	15	9.
1996	Sauber	16	-	-	-	7	12.
1997	Williams	17	1	2	4	42	2.
1998	Williams	16	-	-	1	17	7.
1999	Jordan	16	2	1	3	54	3.
2000	Jordan	17	-	-	1	11	9.
2001	Jordan	10	-	-	-	6	13.
2001	Prost	5	-	-	-	0	13.
2002	Arrows	11	-	-	-	2	18.
2002	Sauber	1	-	-	-	0	18.
2003	Sauber	16	-	-	1	13	11.

Heimildir

Fyrirmynd greinarinnar var „Heinz-Harald Frentzen“ á þýsku útgáfu Wikipedia. Sótt apríl 2010.