Edda (hús íslenskunnar)

Mynd af Eddu í maí 2023.

Edda (áður kölluð „Hús íslenskunnar“ og „Hús íslenskra fræða“) stendur við Arngrímsgötu í Reykjavík. Þar er miðstöð rannsókna og kennslu í íslenskum fræðum; tungu, bókmenntum og sögu. Einnig eru geymd þau handrit úr safni Árna Magnússonar sem Árnastofnun varðveitir, sem og örnefnasafn, orðasöfn og þjóðfræðisafn stofnunarinnar.

Árið 2005 var ákveðið að ráðast í byggingu hússins sem er 6500 fermetrar að stærð. Katrín Jakobsdóttir, þáverandi menntamálaráðherra, tók fyrstu skóflustunguna árið 2013. Framkvæmdir drógust og húsgrunnurinn stóð lengi opinn, uppnefndur „hola íslenskra fræða“, þar sem ýmsar plöntur uxu um tíma.

Húsið var opnað almenningi á sumardaginn fyrsta 2023 og hlaut nafn sitt daginn áður.