Freymóður Jóhannsson

Úr Wikipediu, frjálsa alfræðiritinu
Jump to navigation Jump to search

Freymóður Jóhannsson (12. september 18953. mars 1973) var listmálari og dægurlagahöfundur. Sem lagahöfundur er hann þekktastur undir listamannsnafninu Tólfti september.

Freymóður fæddist að Stærra-Árskógi á Árskógsströnd. Foreldrar hans voru Jóhann T. Þorvaldsson og Hallfríður Jóhannsdóttir. Freymóður lauk gagnfræðaprófi á Akureyri, stundaði eftir það málaranám hjá Ástu málara, en lagði síðar stund á málaralist og fór til framhaldsnáms í Kaupmannahöfn. Þar nam hann við Teknisk Selskabs Skole og við Kunstakademiet. Í Danmörku nam hann leiktjaldagerð við Konunglega leikhúsið í Kaupmannahöfn. Hann fór einnig til náms í listmálun til Ítalíu. Hann var málarameistari á Akureyri, listmálari í Óðinsvéum 1936-39 og vann síðan við Hagstofuna í Reykjavík en stundaði list sína samhliða launavinnunni. Hann var fyrsti sérmenntaði leiktjaldamálari Leikfélags Reykjavíkur og vann margar sviðsmyndir fyrir félagið. Hann var einnig mikill félagsmálamaður.

Freymóður var afkastamikill málari. Verk hans eru mörg hver landslagsmyndir í raunsönnum stíl. Hann hélt fjölmargar myndlistarsýningar á ferli sínum og myndir hans eru víða á heimilum, opinberum stofnunum og í listasöfnum. Freymóður samdi söngtexta og melódísk og grípandi dægurlög, sem sum hver urðu afar vinsæl og hafa haldið vinsældum sínum. Meðal þekktustu laga hans eru Frostrósir; Draumur fangans; Litla stúlkan við hliðið og Litli tónlistarmaðurinn. Lög hans hafa komið út á fjölmörguim hljómplötum t.d. á plötunni Vilhjálmur og Elly Vilhjálms - Lög Tólfta september. Hann var einn af forsprökkum danslagakeppni SKT.