David Lynch

Úr Wikipediu, frjálsa alfræðiritinu
Stökkva á: flakk, leita
David Lynch árið 2009

David Keith Lynch (f. 20. janúar 1946) er bandarískur kvikmyndaleikstjóri sem er þekktur fyrir súrrealískar og oft truflandi kvikmyndir með óhefðbundnum og ólínulegum söguþræði. Fyrsta kvikmyndin í fullri lengd sem hann leikstýrði var Eraserhead (1977). Næst var hann ráðinn til að leikstýra kvikmynd um John Merrick, Fílamaðurinn (The Elephant Man) 1980 sem fékk átta tilnefningar til Óskarsverðlauna. Í kjölfarið leikstýrði hann tveimur kvikmyndum fyrir De Laurentiis Entertainment Group, Dune (1983), sem hlaut slæmar viðtökur, og Blátt flauel (Blue Velvet - 1986) sem sló í gegn og átti þátt í að gera Isabellu Rossellini að stjörnu í Bandaríkjunum.

Árið 1990 hóf hann gerð sjónvarpsþáttaraðarinnar Tvídrangar (Twin Peaks) ásamt Mark Frost sem fyrirtæki Sigurjóns Sighvatssonar Propaganda Films tók þátt í að framleiða. Sama ár gerði hann vegamyndina Tryllt ást (Wild at Heart). Árið 1999 gerði hann svo Saga Straight (The Straight Story) sem hann lýsti sjálfur sem tilraunakenndustu mynd sinni. Hann gerði enn tilraunir með ólínulegan söguþráð í myndunum Trufluð veröld (Lost Highway - 1997), Mulholland Drive (2001) og Upplandsríkið (Inland Empire - 2006) sem er hans síðasta kvikmynd í fullri lengd. Á sama tíma hefur hann gert fjölda stuttmynda eins og Dumbland 2002 (dreift á vefsíðu leikstjórans) og leikstýrt tónlistarmyndböndum fyrir Moby og Nine Inch Nails meðal annarra.

Tenglar[breyta | breyta frumkóða]

Wikimedia Commons er með margmiðlunarefni sem tengist
  Þetta æviágrip er stubbur. Þú getur hjálpað til með því að bæta við greinina.