Cornell-háskóli
Cornell-háskóli (Cornell University) er einkarekinn rannsóknaháskóli í bænum Ithaca í New York fylki í Bandaríkjunum. Skólinn rekur einnig tvo læknaskóla í New York borg og Katar.
Cornell er yngsti skólinn af hinum átta svonefndu Ivy League-skólum. Hann var stofnaður árið 1865 af Ezra Cornell og Andrew Dickson White. Skólanum var ætlað að mennta fólk óháð trúarsannfæringu, kynþætti eða uppruna og átti hann að kenna á öllum sviðum mannlegrar þekkingar — frá fornfræði til raunvísinda og jafnt kennileg sem hagnýtt vísindi.
Tæplega 1600 kennarar starfa við skólann í Ithaca, en rúmlega þúsund kenna við læknaskólann í New York borg og 34 í Katar. Nemendur skólans eru sextán þúsund í grunnnámi, rúmlega tíu þúsund í framhaldsnámi í Ithaca, rúmlega 800 í New York borg og á annað hundrað í Katar. Fjárfestingar skólans nema um 4,3 milljörðum bandaríkjadala.
Cornell háskóli á merkilegt safn íslenskra bóka, Fiske safnið svokallaða. Daniel Willard Fiske ánafnaði háskólanum sitt eigið bókasafn árið 1904 og er það stærsta safn íslenskra bókmennta á erlendri grundu, að Danmörku undanskilinni.
