Birgir Sigurðsson

Birgir Sigurðsson, (28. ágúst 1937 – 9. ágúst 2019) var íslenskur rithöfundur og leikskáld.

Ævi og fjölskylda

Birgir fæddist í Reykjavík, sonur Sigurðar Ingimars Helgasonar, myndlistarmanns og sjómanns, og Friðbjargar Jónsdóttur húsmóður. Birgir ólst upp í Reykjavík, lauk kennaraprófi frá KÍ 1961, stundaði tónlistarnám við Tónlistarskólann í Reykjavík í fimm ár og söngnám í Amsterdam 1967. Birgir var blaðamaður á Tímanum 1961-64. Hann var kennari í Mýrarhúsaskóla á Seltjarnarnesi, Þinghólsskóla í Kópavogi og skólastjóri Ásaskóla í Gnúpverjahreppi og í Hrísey þar til hann sneri sér alfarið að ritstörfum árið 1979. Hann lést á Landspítalanum í Fossvogi.

Skáldaferill

Eftir Birgi liggja ritverk; leikrit, skáldsögur, ljóð, þýðingar og fræðirit auk kvikmynda. Þekktasta leikrit Birgis er líklega Dagur vonar.

Leikverk

• Pétur og Rúna, 1972
• Selurinn hefur mannsaugu, 1974
• Skáld-Rósa, 1978
• Grasmaðkur: Leikrit í fjórum þáttum, 1983
• Dagur vonar, 1987
• Óskastjarnan, 1998
• Dínamít, (flutt 2005)

Þýðingar

• Barn í garðinum, eftir Sam Shephard
• Glerbrot, eftir Arthur Miller
• Köttur á heitu blikkþaki, eftir Tennessee Williams
• Grasið syngur, eftir Doris Lessing
• Marta Quest, eftir Doris Lessing

Skáldsögur

• Frá himni og jörðu, 1989 (smásögur)
• Marta Quest, 1990
• Hengiflugið, 1993

Viðurkenningar

Verk hans Dagur vonar sem var tilnefnt til bókmenntaverðlauna Norðurlandaráðs 1989. Birgir var varaformaður Rithöfundasambands Íslands 1982-1986, var forseti Bandalags íslenskra listamanna 1985-87 og átti m.a. sæti í stjórn Listahátíðar og úthlutunarnefnd Kvikmyndasjóðs. Hann var heiðursfélagi Leikfélags Reykjavíkur. Birgir var á árinu 2019 gerður að heiðursfélaga Rithöfundasambands Íslands.