Þórhallur Sigurðsson (fæddur 23. maí1946)[1] er íslenskur leikstjóri og leikari sem hefur sett upp um 70 leiksýningar og leikið meira en 90 hlutverk á ferli sínum (frá 7. mars 1966)[2].
Hann brautskráðist úr Leiklistarskóla Þjóðleikhússins árið 1970 en hafði þá þegar leikið í fimm sýningum leikhússins, meðal annars stórt hlutverk í Fiðlaranum á þakinu og titilhlutverk í Malcolm litla.[3]
Hann var fastráðinn við Þjóðleikhúsið þar sem hann leikstýrði hátt á fimmta tug leiksýninga, þar af mörgum af vinsælustu sýningum leikhússins. Þórhallur starfaði við Þjóðleikhúsið í yfir 50 ár og er sá starfsmaður sem hefur lengstan starfsaldur allra við húsið.[4]
Hann hefur einnig leikstýrt hjá Leikfélagi Reykjavíkur[5], Leikbrúðulandi, Útvarpsleikhúsinu, Nemendaleikhúsinu og víðar. Sýningarnar Leitin að jólunum (2006) og Gott kvöld (2008) sem hann leikstýrði hlutu báðar Grímuverðlaun Sviðslistasambands Íslands sem barnasýning ársins.[6] Hann hefur leikstýrt sjónvarpsauglýsingum, talsetningum og talsett margar kvikmyndir síðan á tíunda áratugnum.
Þórhallur hlaut heiðursverðlaun Sviðslistasambands Íslands árið 2021 og heiðursmerki hinnar íslensku fálkaorðu fyrir framlag til íslenskrar leiklistar og brautryðjendastarf í barnaleikhúsi þann 17. júní 2024.[7]
