Hermann Gunnarsson

Úr Wikipediu, frjálsa alfræðiritinu
Stökkva á: flakk, leita
Hermann Gunnarsson
Upplýsingar
Fullt nafn Hermann Gunnarsson
Fæðingardagur 9. desember 1946 (1946-12-09) (68 ára)
Fæðingarstaður    Reykjavík, Ísland
Dánardagur    4. júní 2013
Dánarstaður    Pattaya, Taíland


Hermann Gunnarsson, þekktastur sem „Hemmi Gunn“ (9. desember 19464. júní 2013), var landsþekktur íþróttafréttamaður, skemmtikraftur, þáttastjórnandi og einn fremsti knattspyrnumaður Íslendinga á 20. öld. Hermann var án efa þekktastur fyrir geysivinsælan skemmtiþátt sinn Á tali hjá Hemma Gunn, sem sýndur var á RÚV síðasta áratug 20. aldar.

Ævi Hermanns[breyta]

Hermann var einn fremsti knattspyrnumaður Íslands á sjöunda áratugnum. Hann spilaði með Val á blómaskeiði félagsins en var einnig landsliðsmaður. Hemmi þótti einnig nokkuð liðtækur í handbolta og lék nokkra landsleiki í íþróttinni. Hann átti meðal annars markametið yfir flest mörk skoruð í landsleik í mörg ár, þar til það var bætt af Gústaf Bjarnasyni í leik gegn Kína árið 1995.

Hermann stundaði nám við Verzlunarskóla Íslands. Að knattspyrnuferlinum loknum tók hann til starfa sem íþróttafréttamaður hjá Sjónvarpinu. Hann starfaði þar um árabil, þó ekki væri hann alltaf íþróttafréttamaður. Á níunda áratugnum hóf hann að stjórna sínum eigin sjónvarpsþætti hjá RÚV, Á tali hjá Hemma Gunn. Í lok mars 2005 hóf göngu sína nýr tónlistargetraunaþáttur undir stjórns Hermanns, Það var lagið, sem sýndur var á Stöð 2. Stjórnaði þættinum Í sjöunda himni á Stöð 2 veturinn 2006-'07.

Hefur sungið á hljómplötum, bæði einn og með öðrum, meðal annars með Ladda. Hemmi hefur einnig gefið sjálfur út hljómplötu, Frískur og fjörugur. Á henni er að finna lög eins og Einn dans við mig og Fallerí, fallera. Hann starfaði lengi sem fararstjóri og rak veitingastað í Tælandi. Árið 2003 starfaði hann sem kynningarstjóri Vestfirska forlagsins.

Hermann varð bráðkvaddur í Tælandi 4. júní 2013.[1]

Tilvísanir[breyta]

  1. „Hemmi Gunn látinn“. DV [á vefnum]. 4. júní 2013, [skoðað 04-06-2013].