Verzlunarskóli Íslands

Verzlunarskóli Íslands

Stofnaður	1905
Tegund	Einkaskóli
Skólastjóri	Ingi Ólafsson
Nemendur	1.200+
Nemendafélag	NFVÍ
Staðsetning	Ofanleiti 1 103 Reykjavík Ísland
Gælunöfn	Verzló
Gælunöfn nemenda	Verzlingar
Heimasíða	www.verslo.is Nemendafélag

Verzlunarskóli Íslands (eða Verzló eins og hann er oft kallaður) er framhaldsskóli til fjögurra ára staðsettur í Reykjavík. Skólinn var fyrst settur þann 12. október 1905 og tók til starfa um haustið sama ár. Á fyrsta starfsári hans voru nemendur 66, en telja nú á þrettánda hundrað. Hermesarstafurinn er tákn Vezlunarskóla Íslands enda Hermes guð verslunar.

Saga

Skólinn var stofnaður af Verzlunarmannafélagi Reykjavíkur og Kaupmannafélagi Reykjavíkur. Sumarið 1922 tók Verslunarráð Íslands að sér umsjón skólans, og hefur hann síðan verið undir yfirstjórn þess.

Skólinn útskrifaði fyrst stúdenta árið 1945, en stúdentsnámið tók þá sem lokið höfðu verslunarprófi tvö ár. Skólinn var í sex bekkjum árin 1944-1970, en árið 1971 voru tveir neðstu bekkirnir felldir niður og nemendur í staðinn teknir inn í skólann með landspróf eða gagnfræðapróf, og eftir árið 1974 samræmt grunnskólapróf.

Aðstaða skólans

Skólinn hefur starfað á sex stöðum í Reykjavík:

• Vinaminni (Mjóstræti 3) fyrsta árið (1905-1906)
• Melstedshúsi við Lækjartorg árið 1906-1907
• Hafnarstræti 19 árin 1907-1912
• Vesturgötu 10 árin 1912-1931
• Grundarstíg 24 árin 1931-1986
• Ofanleiti 1 frá árinu 1986

Skólastjórar Verzlunarskóla Íslands

• 1905-1915: Ólafur G. Eyjólfsson
• 1915-1917: Jón Sívertsen
• 1917-1918: Helgi Jónsson
• 1918-1931: Jón Sívertsen
• 1931-1953: Vilhjálmur Þ. Gíslason
• 1953-1979: Dr. Jón Gíslason
• 1979-1990: Þorvarður Elíasson
• 1990-1991: Valdimar Hergeirsson
• 1991-2005: Þorvarður Elíasson
• 2005-2007: Sölvi Sveinsson
• 2007-nú: Ingi Ólafsson

Félagslíf

Við skólann er mjög virkt og skipulagt félagsstarf. Nemendafélag Verzlunarskóla Íslands (NFVÍ) starfrækir klúbba og nefndir og eru yfir hundrað nemendur í ýmsum klúbbum og nefndum við skólann og í stjórn nemendafélagsins.

Útgáfa

NFVÍ gefur út hið veglega Verzlunarskólablað sem út kemur einu sinni á ári og telur nú 79 árganga. Blaðið hefur undanfarin ár verið í formi harðspjalda bókar en síðasti árgangur, V76 var gefinn út með mjúkri kápu. Blaðið er eins konar árbók félagslífsins í Verzló og leitast við að draga upp mynd af starfi félagsins hverju sinni. Auk þess gefur félagið út blöðin Viljinn, Harmónía og Kvasi, sem er málgagn nemendafélagsins.

NEMÓ

Árlega er haldið nemendamót, NEMÓ, sem er gjarna talið hápunktur ársins af nemendum og starfsfólki. Söngleikir Verzlunarskólans sem vakið hafa mikla athygli í gegnum árin, eru fluttir á þessu nemendamóti, sem haldið er í febrúar á hverju ári.

Það er nemendamótsnefnd Verzlunarskólans sem sér um sýninguna. Söngleikurinn árið 2008 var byggður á kvikmyndinni Cry Baby og var nefndur Kræ Beibí. Söngleikurinn árið 2009 var byggður á lögum eftir David Bowie og var nefndur Stardust. Söngleikurinn árið 2010 var byggður á lögum eftir Michael Jackson og var nefndur Thriller.

Morfís

Skólanum hefur gengið vel í keppnum sem háðar hafa verið á milli framhaldsskóla landsins, þá einkum Morfís. Keppnin var fyrst haldin árið 1985 og hefur allt í allt verið haldin 21 sinni. Á þessu tímabili hefur Verzlunarskóli Íslands unnið hana 9 sinnum.

Verzlunarskólinn vann Morfís árin:

• 1991
• 1992
• 1993
• 1997
• 1998
• 2000
• 2003
• 2004
• 2005
• 2009

Gettu Betur

Skólinn hefur aðeins einu sinni unnið Gettu Betur, spurningakeppni framhaldsskólanna, þrátt fyrir að hafa komist 6 sinnum í úrslit, en það var árið 2004 er þeir sigruðu Borgarholtsskóla í bráðabana úrslitaviðureignarinnar. Lið skólans skipuðu þeir Hafsteinn Viðar Hafsteinsson, Steinar Örn Jónsson og Björn Bragi Arnarson. Lið skólans árið 2005-2006 komst í úrslit Gettu Betur þar sem þeir biðu lægri hlut gegn Menntaskólanum á Akureyri, eftir að hafa slegið út lið Borgarholtsskóla og Fjölbrautaskóla Suðurlands með auðveldum hætti.

Nokkrir þekktir einstaklingar sem gengu í Verzlunarskóla Íslands

Aðalgrein: Þekktir nemendur Verzlunarskóla Íslands

• Björgólfur Thor Björgólfsson
• Björgólfur Guðmundsson
• Eggert Páll Ólason
• Gísli Marteinn Baldursson
• Hreiðar Már Sigurðsson
• Jóhanna Sigurðardóttir
• Jón Ásgeir Jóhannesson
• Kolbrún Halldórsdóttir
• Selma Björnsdóttir
• Vilhjálmur Þórmundur Vilhjálmsson

Heimildir

„Félagslíf“, skoðað þann 22. desember 2005.

Tenglar

• Vefsíða Verzlunarskóla Íslands
• Nemendafélag Verzlunarskóla Íslands
• Verslunarskólinn 30 ára; grein í Morgunblaðinu 1935

Fyrri: Menntaskólinn í Reykjavík

Sigurvegari Gettu betur 2004

Næsti: Borgarholtsskóli