ATHUGIÐ: Öll framlög á síðu þessa eru álitin almannaeign. Þetta er nauðsynlegt svo að fréttamiðlar geti afritað fréttatilkynningu þessa og jafnvel búið til greinar úr henni án þess að þurfa að spá í GNU FDL.

Grein nr. 10.000 skrifuð á íslensku Wikipediu

8. maí 2006

Íslenska útgáfa Wikipedia-alfræðiritsins (http://is.wikipedia.org/) hefur nú náð þeim áfanga að innihalda 10.000 greinar. Grein númer 10.000 var „móðurborð“ og fyrsta útgáfa hennar var skrifuð klukkan 19:21 þann 6. maí.

Wikipedia er alfræðirit í stöðugri þróun sem haldið er úti á netinu á 137 tungumálum en samanlagður greinafjöldi á öllum tungumálum er nú ríflega 4 milljónir – þar af er rúm milljón greina á ensku útgáfunni sem er sú langstærsta. Sérstaða Wikipediu felst í því að greinar hennar eru skrifaðar af lesendunum sjálfum, hver sem er getur gert breytingar á nánast hvaða grein sem er á mjög einfaldan hátt. Annað sem er einstakt við Wikipediu er að hún er „frjáls“ í þeirri merkingu að hverjum sem er er frjálst að nota greinar af Wikipediu í hvaða tilgangi sem er svo lengi sem þess er getið hvaðan efnið er komið og að allar endurútgáfur eða verk byggð á efni frá Wikipediu séu ekki háð strangari skilyrðum en upprunalegi textinn.

Hugmyndin um alfræðirit sem hver sem er getur breytt er kannski ekkert sérlega traustvekjandi við fyrstu sýn en fimm ára reynsla sýnir að hún gengur vissulega upp. Enska útgáfa Wikipediu er nú stærsta alfræðirit heimsins með 1,1 milljón greina en netútgáfa Encyclopædia Britannica sem er það næststærsta sem gefið er út á ensku inniheldur 120.000 greinar. Athuganir óháðra aðila hafa einnig leitt í ljós að greinar á Wikipediu eru sambærilegar Britannicu hvað varðar gæði.

Íslenska útgáfa Wikipediu hóf göngu sína 5. desember 2003 og telur nú eins og áður segir 10.000 greinar um mjög fjölbreytt viðfangsefni. Þó að íslenska útgáfan verði aldrei jafn víðtæk og sú enska er það fyllilega raunhæft markmið að íslenska Wikipedia verði víðtækasta alfræðiritið sem gefið hefur verið út á íslensku – mikilvægi þess fyrir tungumálið verður seint ofmetið. Til þess að þetta sé hægt vantar þó fleiri hendur. Það er von okkar sem höfum unnið að þessu verkefni hingað til að enn fleiri sjái sér fært að leggja eitthvað að mörkum til að gera veg Wikipediu sem mestan.

Ítarefni

Fyrir frekari spurningar eða viðtöl, vinsamlegast hafið samband við:

Bjarki Sigursveinsson, samskiptafulltrúi íslensku Wikipediu.

Sími: 821 5644

Tölvupóstfang: bjarki@gmail.com