Saurbæjarklaustur
Saurbæjarklaustur var munkaklaustur í Saurbæ í Eyjafirði snemma á 13. öld. Heimildir um Saurbæjarklaustur eru þó mjög litlar og óljósar og það er oft ekki talið með þegar íslensk klaustur eru talin upp. Svo mikið er víst að klausturlifnaður hefur ekki staðið þar lengi. Þó geta heimildir um þrjá ábóta:
- Þorkell Skúmsson, d. 1203.
- Eyjólfur ofláti Hallsson, sem sagður er hafa verið vígður 1206 og dó 1212. Hann var sonur Halls Hrafnssonar ábóta á Munkaþverá og var áður prestur á Grenjaðarstað.
- Þorsteinn Tumason var af ætt Ásbirninga, óskilgetinn sonur Tuma Kolbeinssonar og bróðir Kolbeins og Arnórs Tumasona. Guðrún dóttir hans var fylgikona Sveinbjarnar Hrafnssonar goðorðsmanns á Eyri, sonar Hrafns Sveinbjarnarsonar. Þorsteinn dó 1224 og eftir það er ekkert getið um klaustur eða munka í Saurbæ.