Mezzoforte
.jpg)
Mezzoforte er bræðingshljómsveit sem var stofnuð árið 1977. Stofnendur Mezzoforte voru Eyþór Gunnarsson (píanó/hljómborð), Friðrik Karlsson (gítar), Jóhann Ásmundsson (bassa) og Gunnlaugur Briem (trommur).
Einhverjar mannabreytingar hafa verið á þeim árum sem hljómsveitin hefur verið starfandi. Meðal annars var saxófónleikarinn Kristinn Svavarsson meðlimur sveitarinnar frá 1982 til 1985 en saxófónleikarinn Óskar Guðjónsson gekk í sveitina um miðjan 10. áratuginn.
Fyrsta hljómplata sveitarinnar kom út 1979 en fjórða platan sem tekin var upp árið 1982 og innihélt lagið Garden Party opnaði sveitinn leið inn á alþjóðamarkað. Garden Party náði miklum vinsældum víða um heim, komst m.a. Í 17. sæti breska vinsældalistans og LP platan, Surprise Surprise fékk líka mjög góðar viðtökur. Í kjölfarið fluttu meðlimir til Englands og upphófst þá nokkurra ára tímabil sem einkenndist af stöðugum tónleikaferðum, fyrst í Bretlandi, svo víða um Evrópu og loks í Asíu.
Hljómsveitin hefur starfað nær óslitið síðan og gefið út alls 15 LP/CD skífur og auk þess DVD mynddisk. Tónleikarnir eru orðnir fleiri en 1.000 í yfir 40 löndum. Árið 2013 var Mezzoforte tilnefnd til Tónlistarverðlauna Norðurlandaráðs og árið 2014 hlaut sveitin Heiðursverðlaun Íslensku Tónlistarverðlaunanna.
Frá 2008 hefur hljómsveitin haldið að meðaltali 20-30 tónleika erlendis á hverju ári, t.d. á Norðurlöndum, í Þýskalandi, Sviss, Austurríki, Hollandi, Englandi, Spáni, Portúgal, Suður Afríku, Japan, Indónesíu, Rússlandi, Úkraínu, Belarus, Kazakstan, Ungverjalandi, Tékklandi, Slóvakíu, Grænlandi, Færeyjum og (stöku sinnum) á Íslandi.
Þrír af fjórum stofnmeðlimum starfa enn með sveitinni, þeir Eyþór Gunnarsson, Friðrik Karlsson og Jóhann Ásmundsson en aðrir meðlimir eru Ari Bragi Kárason trompetleikari, Benedikt Brynleifsson trommuleikari og Jonas Wall saxófónleikari (frá Svíþjóð).
Árið 2017 fagnaði sveitin 40 ára afmæli sínu með tvennum tónleikum í Háskólabíói. U.þ.b. 600 erlendir gestir gerðu sér ferð til Íslands af því tilefni. Til stendur að endurtaka leikinn á 50 ára afmælinu í september 2027.
Tengill
[breyta | breyta frumkóða]
