Jóhanna d'Évreux, Frakklandsdrottning
Jóhanna (1310 – 4. mars 1371) eða Jeanne d'Évreux var frönsk hefðarkona, drottning Frakklands og Navarra frá 1325 til 1328 sem þriðja kona Karls 4. Frakkakonungs.
Jóhanna var dóttir Loðvíks af Frakklandi, greifa af Évreux, og konu hans Margrétar af Artois. Faðir hennar var sonur Filippusar 3. Frakkakonungs og hálfbróðir Filippusar 4., föður Karls. Þau voru því bræðrabörn og þurftu að sækja um leyfi til Jóhannesar XXII páfa til að mega ganga í hjónaband. Það var auðfengið og þau giftust 1325. Þau eignuðust tvær dætur, Jóhönnu, sem dó á fyrsta ári, og Maríu, og þegar Karl dó 1. febrúar 1328 var Jóhanna þunguð að sínu þriðja barni, átján ára að aldri. Þess var beðið í ofvæni hvort barnið yrði sonur því að þá hefði hann erft krúnuna. En Jóhanna ól enn eina dóttur, Blönku, og það var Filippus, sonur Karls af Valois, annars föðurbróður Karls 4., sem varð konungur.
María dóttir Jóhönnu dó ógift árið 1340 en Blanka giftist Filippusi hertoga af Orléans.
Tíðabók (bænabók) Jóhönnu, skrifuð á meðan hún var drottning og líklega gjöf frá Karli konungi, er enn varðveitt og er í Metropolitan-safninu í New York.
Heimild
[breyta | breyta frumkóða]- Fyrirmynd greinarinnar var „Jeanne d'Évreux“ á ensku útgáfu Wikipedia. Sótt 12. júní 2010.