Fáni Bútan

Fáni Bútan er uppskiptur í tvennt frá neðra vinstri horni til efra hægri horns í tvo þríhyrnda fleti með þeim gula fyrir ofan og appelsínuleitan fyrir neðan. Hvítur dreki er um miðjan fánann. Hlutföll eru 2:3. Guli liturinn vísar til konungsins en appelsínuliturinn vísar til búddatrúarinnar.

Skipting fánans táknar skiptingu hins andlega og veraldlega máttar í landinu. Drekinn um miðjan fánann táknar nafn landsins á máli heimamanna dzongkha: Bútanbúar kalla landið ekki Bútan heldur Druk sem merkir „dreki“. Hvíti litur drekans táknar hreinleika.

Fánar Bútan og Wales eru einu tveir þjóðarfánarnir í heiminum með dreka. Fáninn hefur verið í notkun, með nokkrum minni breytingum, frá 19. öld.