Clapham Rovers F.C.
Clapham Rovers var enskt knattspyrnu- og rúbbílið sem stofnað var í Lundúnum árið 1869 og lét talsvert að sér kveða á upphafsárum knattspyrnunnar í Englandi. Liðið varð bikarmeistari árið 1880.
Saga[breyta | breyta frumkóða]
Clapham Rovers var stofnað af hópi ungra íþróttaáhugamanna í ágústmánuði 1869 og einsetti sér frá upphafi að keppa bæði í fótbolta og rúbbí. Liðið hafði á stórum hópi leikmanna að skipa og gat þegar á sínu fyrsta starfsári keppt tvo kappleiki, einn í hvorri íþróttagrein, á hverjum sunnudegi.
Veturinn 1871-72 var Clapham Rovers í hópi fimmtán félaga sem tóku þátt í ensku bikarkeppninni þegar hún var haldin í fyrsta sinn. Jarvis Kenrick, leikmaður Clapham Rovers, skoraði fyrsta markið í sögu keppninnar í 3:0 sigri á Upton Park. Árið 1879 lék félagið til úrslita í bikarkeppninni en tapaði 1:0. Í þeirri viðureign tefldi Clapham Rovers fram 17 ára og 245 daga leikmanni, sem lengi var met í úrslitaviðureign. Árið eftir vann félagið sinn fyrsta og eina bikarmeistaratitil eftir sigur á Oxford University.
Veturinn 1885-86 var Clapham Rovers í síðasta sinn skráð til leiks í bikarkeppninni en félaginu var vísað úr keppni án þess að leika. Óvíst er hvenær starfsemin leið undir lok.
Á rúbbísviðinu lét félagið meira til sín taka og lengur. Síðasti kappleikur þess í þeirri íþrótta var árið 1892.
Titlar[breyta | breyta frumkóða]
- (1) 1879-80