AOL

Disklingur með AOL-hugbúnaði fyrir Windows frá 1994.

AOL (áður America Online) er bandarískt fjölmiðlafyrirtæki með höfuðstöðvar í New York-borg. AOL er dótturfyrirtæki Verizon Communications. Fyrirtækið fæst einkum við dreifingu efnis á Veraldarvefnum og það á og rekur vefi á borð við The Huffington Post, TechCrunch og Engadget.

Fyrirtækið var stofnað árið 1983 og hét þá Control Video Corporation eða CVC. Fyrirtækið rak tölvunet fyrir Atari 2600-leikjatölvur sem hægt var að tengjast gegnum mótald. Árið 1985 var nýtt fyrirtæki, Quantum Computer Services, stofnað á grunni CVC með netþjónustuna Quantum Link fyrir Commodore 64 og 128. Árið 1988 kom AppleLink fyrir Apple Macintosh-tölvur og PC Link fyrir IBM PC-samhæfðar tölvur. Árið 1989 breytti fyrirtækið nafni sínu í America Online. Netleikir voru mikilvægur hluti af þjónustu fyrirtækisins. Árið 1993 bauð fyrirtækið upp á Internet-tengingu fyrir notendur. Það var þá orðið stærra en helstu keppinautar sínir, GEnie, Prodigy og CompuServe. Árið 2000 sameinaðist AOL fjölmiðlarisanum Time Warner. Hluthafar AOL eignuðust 55% í nýja fyrirtækinu.

Eftir 2002 tók notendum AOL að fækka. Árið 2006 lokaði AOL síðasta þjónustuveri sínu í Bandaríkjunum. Árið 2009 var fyrirtækinu breytt í sjálfstætt netmiðlafyrirtæki með tekjur byggðar á auglýsingum. Það keypti vefmiðla á borð við The Huffington Post og hóf framleiðslu heimildaþátta. Árið 2015 keypti Verizon AOL.

  Þessi grein er stubbur. Þú getur hjálpað til með því að bæta við greinina.