Sérsveit ríkislögreglustjóra

Sérsveit ríkislögreglustjóra (stundum kölluð Víkingasveitin) er vopnuð sérsveit Íslensku lögreglunnar, sem hefur m.a. hlotið þjálfun til að fást við aðstæður sem gætu komið upp við hryðjuverk. Sérsveitin hefur stækkað undanfarin ár, en telur nú 42 sérsveitarmenn, og nálgast það að vera jafn fjölmenn og finnska sérsveitin, Karhuryhmä, sem hefur um 70 sérsveitarmenn á sínum snærum. Ríkislögreglustjóri hefur gefið það út að sérsveitin verði full mönnuð með 52 sérsveitarmönnum.

Saga

Sérsveitin var stofnuð þann 19. óktóber 1982, þegar fyrstu sérsveitarmennirnir luku æfingum með norsku sérsveitinni, sem er stundum kölluð Delta. Það voru margar ástæður fyrir stofnun sérsveitarinnar íslensku, t.d. sú að árið 1976 lenti þota sem hafði verið rænt á Keflavíkurflugvelli, og notuðu flugræningjarnir skotvopn gegn óvopnaðri lögreglu. Talið var ljóst að íslenska lögreglan þurfti á vopnaðri sérsveit að halda til að bregðast við slíkum aðstæðum. Sérsveitarmennirnir hafa aldrei þurft að beita vopnum sínum á móti glæpamönnum og eru afar stoltir af þeirri staðreynd.

Árið 2003 ákvað Björn Bjarnason, dómsmálaráðherra, að fjölga í sérsveitinni. Sérsveitin var einungis með starfsstöð hjá ríkislögreglustjóra þar til þessi breyting átti sér stað en þá var tveimur starfsstöðum bætt við, hjá lögreglunni á Keflavíkurflugvelli og hjá lögreglunni á Akureyri. Eftir sameiningu lögregluembættanna í Keflavík og á Keflavíkurflugvelli þann 1. janúar 2007 varð til embætti Lögreglustjórans á Suðurnesjum og hefur nú sérsveitin starfsstöð þar.

Verkefni

Sérsveitin sinnir fjölmörgum verkefnum á ári hverju. Sérsveitin kemur t.d. að þjálfun lögreglumanna hjá hinum ýmsu lögregluembættum landsins sem og sérstakri þjálfun og fræðslu hjá Lögregluskóla ríkisins. Sérsveitin sinnir viðbótarlöggæslu við embættin þar sem hún hefur starfsstöð, þ.e.a.s. á Höfuðborgarsvæðinu, á Suðurnesjum og á Akureyri. Sérsveitin aðstoðar einnig öll lögregluembættin á landinu, t.d. þegar handtaka þarf hættulega eða vopnaða aðila. Sérsveitin sinnir einnig vopnaðri gæslu þegar erlendir þjóðhöfðingjar koma hingað til lands.

Skotvopn

Sérsveitin er vopnuð með eftirfarandi skotvopnum:

• Heckler & Koch MP5 hríðskotabyssa
• Heckler & Koch G36 riffill
• Blaser R93-7.62×51 NATO riffill
• Glock 17 skammbyssa
• Steyr SSG 69 riffill
• Mossberg 500 haglabyssa

Tenglar

• Heimasíða lögreglunnar
• Myndband af æfingum sérsveitarinnar
• Myndband af æfingum sérsveitarinnar