Nuuk

Úr Wikipediu, frjálsa alfræðiritinu
Stökkva á: flakk, leita
Nuussuaq-hverfið í Nuuk, fjallið Sermitsiaq í bakgrunni

Nuuk er hið grænlenska heiti á höfuðstað Grænlands sem á dönsku nefnist Godthåb og var þess vegna áður fyrr stundum nefndur Góðvon á íslensku. Hið opinbera nafn bæjarins, Nuuk, er frá því að Grænland fékk heimastjórn árið 1979. Nuuk þýðir „tangi“ á grænlensku. Nuuk er hluti af sveitarfélaginu Sermersooq og íbúafjöldi er um 15.000. Heimastjórn Grænlands, þing og háskóli hafa aðsetur í Nuuk.

Nuuk stendur við Davis-sund á suðvesturströnd Grænlands, á tanga þar sem tveir djúpir firðir skerast inn í landið. Má segja að bærin skiptist í tvennt, annars vegar eldri hluti sem nefndur er "Koloniehavn" og eru þar aðallega byggingar frá 18. og 19. öld. Hins vegar byggingar sem eru aðallega frá seinni hluta 20. aldar, meðal annars stór fjölbýlishús.

Aqqusinersuaq, aðalgatan í Nuuk

Bærinn Nuuk hefur vaxið hratt. Um 1950 var íbúafjöldi einungis um 1000 manns og hefur hinn hraði vöxtur leitt til margvíslegra félagslegra vandamála.

Atvinnulífið í Nuuk einkennist af fiskvinnslu, stjórnsýslu og ferðaþjónustu. Höfnin er oftast opin allt árið og við bæinn er einnig alþjóðlegur flugvöllur.

Það var trúboðinn Hans Egede sem stofnaði Godthåb sem trúboðsstöð og verslunaraðsetur árið 1728 í umboði danakonungs. Þar sem nú stendur bærinn Nuuk var á tímum norrænna manna á Grænlandi nefnt Vestribyggð og er enn mikið af leifum þess tíma að finna í grendinni.

Tenglar[breyta]