Mein Kampf

Úr Wikipediu, frjálsa alfræðiritinu
Stökkva á: flakk, leita

Mein Kampf (ísl. Barátta mín) er ritverk eftir Adolf Hitler þar sem hann tvinnar saman sjálfsævisögulegum staðreyndum við hugmyndafræði sína um nasismann.

Hitler skrifaði bókina meðan hann sat í fangelsi í Landsberg í Bæjaralandi, en þangað var hann sendur vegna þátttöku sinnar í bjórkallarauppreisninni. Fyrsta bindið (Eine Abrechnung) kom fyrst út þann 18. júlí árið 1925 og það síðara árið 1926 (Die Nationalsozialistische Bewegung).

Upphaflega valdi Hitler nafnið Fjögur og hálft ár [af baráttu] gegn lygum, heimsku og hugleysi (þýska Viereinhalb Jahre [des Kampfes] gegen Lüge, Dummheit und Feigheit) en útgefandi hans, Max Amann, stytti það niður í Mein kampf, eða Barátta mín.

Bókin seldist vel. Um 287.000 eintök höfðu selst þegar ríkisstjórn þjóðernisjafnaðarmanna tók við völdum í Þýskalandi 1933. Bókin rauk út eftir það og á árinu 1933 voru yfir milljón eintök prentuð. 1943 höfðu yfir 10 milljón eintök verið prentuð af bókinni. Valdir kaflar úr bókinni hafa verið þýddir á íslensku og gefnir út á bók.