Stúdentafélag Háskólans í Reykjavík

Úr Wikipediu, frjálsa alfræðiritinu
(Endurbeint frá SFHR)

Stúdentafélag HR (SFHR) er nemendafélag við Háskólann í Reykjavík.

Um félagið[breyta | breyta frumkóða]

Stúdentafélagið (SFHR) er hagsmunafélag stúdenta við Háskólann í Reykjavík. Félaginu ber að standa vörð um hagsmuni félagsmanna sinna sem og að auka einingu meðal nemenda skólans. Allir nemendur Háskólans í Reykjavík eru meðlimir í SFHR og eru félagsgjöld engin.

Stjórn SFHR er skipuð sjö aðilum sem sitja eitt skólaár í senn og fara kosningar fram á vorönn. Starfsemi félagsins gengur að miklu leyti út á að veita skólanum aðhald hvað varðar gæði kennslunnar og aðstöðu nemenda til náms. Félagið er því í góðu sambandi við stjórnendur skólans og er oft kallað eftir áliti stjórnar SFHR varðandi úrlausn ýmissa mála. Stjórn SFHR situr í ýmsum nefndum og ráðum Háskólans í Reykjavík, til dæmis námsráð, siðanefnd, jafnréttisnefnd og fleira. Forseti situr í framkvæmdarráði skólans sem er æðsta vald HR fyrir utan stjórnarfundi eigenda.

Hver deild við skólann hefur sitt hagsmuna- og nemendafélag sem stendur vörð um hagsmuni félagsmanna sinna. Formaður hvers félags situr í fulltrúaráði SFHR og hefur þannig áhrif á stefnur og verkefni SFHR.

Aðilar að SFHR eru sjálfkrafa aðilar að Byggingarfélagi námsmanna (BN) og Bandalagi íslenskra námsmanna (BÍSN). BN sér um byggingu og viðhald námsmannaíbúða sem standa nemendum HR til boða á nemendagörðum sem staðsettir eru víðsvegar um borgina. BÍSN, sem stendur fyrir Bandalag Íslenskra Sérskólanema, er námsmannahreyfing sem gætir hagsmuna nemenda aðildarskóla sinna og hefur SFHR verið í forystuhlutverki samtakanna. Einnig eru fulltrúar SFHR í fulltrúaráði Landssamtaka Íslenskra Stúdenta (LÍS).

Skrifstofa Stúdentafélagsins er staðsett í HR á 2. hæð í Mars (M205). Heimasíða félagsins er https://sfhr.is/

Forsetar SFHR síðustu ár[breyta | breyta frumkóða]

Forsetar (áður formaður) síðustu ár*
Nafn Tímabil
Jakob Daníelsson 2023-2024
Jón Goði Ingvarsson 2022-2023
Alexander Mar 2021-2022
Arna Rut Arnarsdóttir 2020-2021
Eygló María Björnsdóttir 2019-2020
Eygló María Björnsdóttir 2018-2019
Rebekka Rún Jóhannesdóttir 2016-2017
Elísabet Erlendsdóttir 2015-2016

*Listinn er ekki með öllum forsetum heldur þeim sem skráð eru í ársskýrslur félagsins síðustu ár.