Kleinudagurinn

Kleinudagurinn var haldinn í fyrsta sinn þann 10. nóvember árið 2021.

Í tilkynningu sem send var á íslenska fjölmiðla kemur fram að alþekkt sé í nágrannalöndum Íslands að vinsælt bakkelsi og aðrir réttir eigi sér sérstakan dag, á borð við Kanilsnúðadaginn í Svíþjóð og pönnukökudaginn í Danmörku. Var jafnframt bent á að kleinan sé ekki síður mikilvæg íslenskri þjóðmenningu og því tilvalið að fagna henni með sams konar degi.

Dagsetningin sjálf var í sömu tilkynningu sögð hafa orðið fyrir valinu þar sem Íslendingar fagni bolludeginum og fjölmörgum öðrum dögum á vorönn en að fáir slíkir dagar væru að hausti. Þegar haustlægðirnar dynji á sé notaleg tilhugsun að hittast með fjölskyldunni og steikja kleinur, en dagurinn megi þó ekki vera svo seint að hann keppi við laufabrauðsgerðina.

Á Instagram-síðu helgaðri kleinudeginum kemur fram að fjallað hafi verið um kleinudaginn í Morgunvaktinni á Rás 1, í hádegisfréttum RÚV, í Popplandi á Rás 2 og í Síðdegisútvarpinu á Rás 2.