Hollí hú

Hollí hú er íslenskur útileikur fyrir hóp. Leikurinn er spilaður við húsvegg þar sem þátttakendur raða sér upp og velja einn til að vera „hann“. Sá sem er „hann“ fær bolta og stillir sér upp fyrir framan hópinn. Hann velur sér orð og gefur upp hvaða flokki orðið tilheyrir, svo sem hvort um er að ræða nafn á manneskju, dýraheiti eða eldhúsáhald. Hann gefur svo upp fyrsta stafinn í orðinu og kastar boltanum til þess sem fyrstur er í röðinni. Sá giskar á orðið og kastar boltanum aftur. Ef orðið er ekki rétt, fær næsti tækifæri og svo koll af kolli. Ef enginn getur giskað rétt á orðið er næsti stafur gefinn upp.

Þegar einhver giskar á rétta orðið kastar sá sem er „hann“ boltanum í húsvegginn, kallar „Hollí!“ og hleypur í burtu. Sá sem giskaði rétt hleypur að boltanum, grípur hann og kallar „Hú!“. Þá stoppar sá sem er „hann“ og myndar körfu með handleggjunum. Sá sem giskaði rétt má nú taka þrjú risa skref, þrjú venjuleg skref og þrjú hænuskref í átt að honum og reynir svo að kasta boltanum í körfuna. Ef hann hittir körfuna fær hann að vera hann næst, en ef hann hittir ekki fer hann aftur í röðina.

Sjá einnig

• Listi yfir leiki barna

Tilvísanir

  Þessi grein er stubbur. Þú getur hjálpað til með því að bæta við greinina.