Gollurshús

Gollurshús eða hjartapoki (pericardium) er sterkur bandvefshjúpur sem umlykur hjartað og samanstendur af tveimur lögum; trefjahluta og háluhluta.

• Trefjahlutinn kallast trefjagollurshús (p. fibrosa) og myndar sterkan, ytri hluta gollurshússins. Það er gert úr bandvef og rennur að hluta saman við þindina.
• Háluhlutinn eða varagollurshúsið (p. serosa) er gerður úr einfaldri flöguþekju sem seytir frá sér vökva og skiptist í tvo hluta, veggþynnu (parietalis) sem þekur innri flöt trefjagollurshússins og iðraþynnu (p. visceralis) sem þekur ytri hluta hjartans. Þynnurnar renna saman við rætur stóru æðanna sem ganga inn í hjartað og mynda þannig vökvafylltan poka milli hjartans og gollurshússins sem verndar hjartað gegn núningi og sýkingum.

Fræðilega heitið er tekið úr grísku peri (περί; um(hverfis)) og cardion (κάρδιον; hjarta).