Galíleó (gervihnattaleiðsögn)

Fyrsta geimskot Galíleógervihnattar á Soyuz-eldflaug í október 2011

Galíleó er gervihnattaleiðsagnarkerfi þróað af Evrópusambandinu og Geimferðastofnun Evrópu. Geimferðaáætlanastofnun Evrópusambandsins (EUSPA) hefur umsjón með kerfinu. Höfuðstöðvar kerfisins eru í Prag í Tékklandi. Tvær jarðstöðvar eru í Oberpfaffenhofen í Þýskalandi og Fucino á Ítalíu. Kerfið dregur nafn sitt af ítalska stjörnufræðingnum Galíleó Galílei.

Markmiðið með gerð Galíleókerfisins var að stofna nákvæmt og sjálfstætt evrópskt gervihnattaleiðsagnarkerfi sem Evrópuþjóðir gætu treyst á, án þess að þurfa að nota GPS-kerfi Bandaríkjanna eða GLONASS-kerfi Rússlands ef þeim yrði lokað. Notkun á grundvallarleiðsagnarþjónustu er öllum opin ókeypis, en fyrirtæki geta keypt aðgang að nákvæmari staðsetningarþjónustu. Galíleókerfið er hannað þannig að það getur staðsett hlut með eins metra skekkju, og býður upp á betri staðsetningarhæfni við hærri hæðir en núverandi kerfi gefa kost á. Í október 2011 var fyrstu tveimur af fjórum gervihnöttum skotið upp til að prófa kerfið. Næstu tveir gervihnettirnir fylgdu þeim í október 2012. Frá og með september 2015 voru tíu Galíleógervihnettir á sporbraut um jörðina og árið 2024 voru þeir orðnir 25. Kerfið var formlega gangsett með takmarkaðri þjónustu árið 2016.

Galíleó býður upp á nýjan björgunarmöguleika sem hefur ekki verið í boði hingað til. Líkt og gervihnettir GPS og GLONASS, eru gervihnettir Galíleó útbúnir merkissvörum sem áframsenda merki frá senditæki notandans á stjórnstöð sem setur björgunaraðgerðir í gang. Um leið getur Galíleókerfið sent svarboð til neyðarsendisins og tilkynnt notandanum að beiðni hans hafi verið móttekin og aðstoð sé á leiðinni. Þetta eru talsverðar framfarir miðað við það sem GPS og GLONASS bjóða upp á, en þau geta ekki sent skilaboð aftur til notandans. Þetta mun bæta virkni Cospas-Sarsat-kerfisins.

Tilvísanir

  Þessi grein er stubbur. Þú getur hjálpað til með því að bæta við greinina.