Fiskabúr
Fiskabúr er lífbúr með að minnsta kosti eina gegnsæja hlið þar sem fiskar og aðrar vatnategundir eru ræktaðar. Fiskabúr eru aðallega fyrir ræktun fiska, en önnur vatnadýr, eins og krabbadýr, froskdýr, skjaldbökur, sniglar, sjávarspendýr og vatnaplöntur eru oft höfð með. Í sædýrasöfnum eru oft gríðarstór fiskabúr sem geta haldið yfir milljón lítrum af vatni.
Rekja má fiskabúr til ársins 1850 þegar enski efnafræðingurinn Robert Warington gerði tilraunir með rúmlega 60 lítra búr. Nokkrum árum seinna var fyrsta fiskabúr fyrir almenning sett upp í dýragarðinum í London. Fiskabúr urðu útbreiddari eftir fyrri heimsstyrjöldina þegar rafmagn gaf möguleika á lýsingu, síun og hitun vatns. Fáanleiki framandi fiska frá hitabeltislöndum varð möguleiki og með vöruflutningum með flugvélum varð áhugamálið algengara eftir miðja 20. öld. Búr úr gleri og akrýlgleri urðu viðtekin venja með sílíkoneinangrun milli samskeyta. Tæki eins og síunar- og dælutæki, ljós og hitarar eru búnaður sem fylgir oft með búrum. Lok er á búrum og er ljósið vanalega undir því.
Innanstokksmunir sem algengir eru í fiskabúrum eru sandur eða smágerðir steinar, viðarbútar (rætur), plöntur (lifandi eða gervi), steinar í ýmsu formi, skrautmunir úr ýmsu hráefni.
Eftir því sem fiskabúr er minna eru meiri líkur á að lífkerfið verði fyrir hnjaski. Niðurbrotsefni (ammónía og nítrít) sem safnast upp eru með meiri þéttni í þeim. Skipta þarf um vatn reglulega og vatnsryksuga óhreinindi.
Tengill
[breyta | breyta frumkóða]Heimild
[breyta | breyta frumkóða]
