Félag Sameinuðu þjóðanna á Íslandi
Félag Sameinuðu þjóðanna á Íslandi er íslensk félagasamtök stofnuð í apríl 1948 í kjölfar stofnunar Sameinuðu þjóðanna 1945. Sambærileg félögvoru stofnuð í öðrum aðildarríkjum Sameinuðu þjóðanna sem telja nú vel á annað hundrað. Framtíðarsýn Félags Sameinuðu þjóðanna á Íslandi er að vera afl til friðar, félagslegs réttlætis og umhverfisverndar með stuðningi við hnattræna heimsborgaravitund.
Hlutverk Félags Sameinuðu þjóðanna á Íslandi er að næra starfsemi Sameinuðu þjóðanna með samstarfi og samvinnu. Félaginu ber að vera leiðbeinandi afl í íslensku þjóðfélagi með áherslu á markmið Sameinuðu þjóðanna um sjálfbæra þróun, heimsmarkmiðin. Félag Sameinuðu þjóðanna vinnur að því að efla þekkingu, skilning og umræðu um gildi og starfsemi Sameinuðu þjóðanna og leggur áherslu á að skapa vettvang fyrir menntun, þátttöku og samvinnu um alþjóðleg málefni – með sérstakri áherslu á ungt fólk, fræðslustofnanir og almenning.
Störf Félags Sameinuðu þjóðanna fela í sér að:
- Vinna að markmiðum og gildum Sameinuðu þjóðanna á landsvísu.
- Efla lýðræðislega og virka þátttöku barna og ungmenna í samfélagsmálum.
- Stuðla að fræðslu og umræðu um Sþ, mannréttindi, sjálfbærni, jafnrétti og frið.
- Tengja saman íslenskt samfélag við alþjóðlegar áherslur, með sérstakri áherslu á heimsmarkmiðin um sjálfbæra þróun.
Félagið er rekið með frjálsum framlögum og með styrkjum frá íslenska ríkinu. Framkvæmdastjóri félagsins er Vala Karen Viðarsdóttir. Meðal verkefna sem félagið hefur komið að er rekstur vefanna un.is.
Stjórn Félags Sameinuðu þjóðanna
[breyta | breyta frumkóða]Stjórn Félags Sameinuðu þjóðanna er kosin á aðalfundi félagsins. Fyrirstarfsárið 2025-2026 skipa stjórn: Eva Harðardóttir, formaður; Þórður Kristinsson, varaformaður; Erlingur Erlingsson; Helen María Ólafsdóttir; Páll Ásgeir Davíðsson, Rakel Anna Boulter og Viktoría Valdimarsdóttir.
Norrænt samstarf
[breyta | breyta frumkóða]Félag Sameinuðu þjóðanna á Íslandi á í góðu samstarfi við systursamtök sín á Norðurlöndunum. Samráðsfundir eru haldnir meðal árlega og skiptast norrænu félögin á að vera gestgjafar. Öll félögin halda úti heimasíðu og eru þær eftirfarandi: Finnland www.yk.fi – , Danmörk – www.fnforbundet.dk, Noregur – www.fn.no, Svíþjóð – www.fn.se.