Cathy Freeman

Cathy Freeman

Cathy Freeman (f. Catherine Astrid Salome, 16. febrúar árið 1973 í Mackay í Queensland) er fyrrverandi hlaupakona. Catherine, betur þekkt sem Cathy, var einn frægasti ástralski íþróttamaður 10. áratugs síðustu aldar. Aðalkeppnisgrein Cathy var 400 metra spretthlaup. Cathy varð heimsfræg á ólympíuleikunum í Sydney árið 2000 þegar hún vann gullverðlaun og vakti athygli á stöðu frumbyggja Ástralíu.

Hlaupaferill

Cathy byrjaði snemma að æfa frjálsar íþróttir. Stjúppabbi hennar þjálfaði hana þegar hún var ung. Árið 1989 fékk Cathy námsstyrk og fékk betri þjálfun í skólanum. Þegar hún var 17 ára vann hún sín fyrstu gullverðlaun á stórmóti þegar hún sigraði í bæði 200 metra og 400 metra halupi á samveldisleikunum. Þá setti hún einnig Ástralíumet í 200 metra hlaupi sem var 22,2 sekúndur. Cathy var fyrsti frumbyggi Ástralíu sem tók þátt í ólympíuleikum. Árið 1992 tók hún þátt á sínum fyrstu ólympíuleikum en vann ekki til verðlauna.

Árið 1995 naut Cathy mikillar velgengni. Hún hljóp meðal annars hraðar en Marie-José Pérec frá Frakklandi sem var heimsmeistari í 400 metra hlaupi það ár. Sá sigur kom Freeman í annað sæti heimslistans í 400 metra hlaupi. Hún hélt því sæti næsta ár, og varð fyrsta ástralska konan til að hlaupa 400 metra á undir 50 sekúndum, sem hún gerði sjö sinnum í úrslitahlaupum á ferlinum.

Árið 2000 var tímamótaár fyrir Cathy. Hún keppti á ólympíuleikunum í Sydney og var þá þegar orðin mjög þekkt í Ástralíu. Hún var valin til að kveikja á ólympíueldinum á opnunarhátíðinni. Þegar hún kom fyrst í mark í 400 metra hlaupinu hljóp hún sigurhringinn með tvo fána á sér; ástralska fánann og fána frumbyggja Ástralíu. Hún var fyrsti frumbyggi Ástralíu til þess að vinna gull á ólympíuleikum. Eftir ólympíuleikana tók hún aðeins þátt í einu móti og árið 2003 lagði Cathy skóna á hilluna.

Annað

Eftir að Cathy Freeman lagði skóna á hilluna stofnaði hún Cathy Freeman Foundation. Eitt af því sem góðgerðarfélag hennar gerir er að styrkja ungt fólk til náms.