Bullshit MC
Bullshit MC var danskur vélhjólaklúbbur sem starfaði frá 1979 til 1987. Klúbburinn hafði aðsetur á Amager í Kaupmannahöfn. Í fyrstu komu félagarnir frá klúbbunum Filthy Few og Nøragersminderødderne MC.[1]
Skömmu eftir að fríríkið Kristjanía bannaði sölu harðra fíkniefna á svæðinu hófu meðlimir Bullshit að selja þar hass fyrir allra augum.[2] Þetta vakti athygli fjölmiðla. Enn fremur gengu sögur um slagsmál þeirra á börum. Átökin milli klúbbsins og Hells Angels eru kölluð fyrsta rokkarastríðið. Í því létust tólf; þar af sjö meðlimir Bullshit.
Fyrsti forseti klúbbsins var Henning Norberg Knudsen. Hann var skotinn til bana þann 25. maí 1984 af Hells Angels-meðlimnum Jørn Jønke Nielsen, sem seinna varð forseti klúbbsins í Danmörku.[3] Þann 21. desember 1985 var nýr forseti Bullshit, Anker Walther Markus, skotinn til bana ásamt einum öðrum með átta skotum í Kristjaníu.[4]
Þann 1. október 1987 fann lögreglan lík af manni í steypugólfi á stað þar sem meðlimir Bullshit héldu sig. Eftir það ráku íbúar Kristjaníu klúbbinn burt.[1]
Að lokum fór næsti forseti Bullshit, Michael Linde, og samdi frið við Hells Angels. Bullshit var síðan lagður niður árið 1988. Nokkrir af félögunum stofnuðu síðar, eða 1993, Bandidos MC Denmark.
Árið 2024 var dönsk sjónvarpsþáttaröð (mínísería) gerð um sögu klúbbsins eftir Molly Stensgaard, Bo hr. Hansen og Milad Alami, byggð á samnefndri bók eftir Camilla Stockmann og Janus Køster-Rasmussen frá 2017.[5] Þættirnir, Bullshit, voru sýndir á Prime Video og síðar Viaplay.[6]
Tilvísanir
[breyta | breyta frumkóða]- 1 2 Sune Navntoft (6. október 2017). „Bullshit tabte Danmarks Første Rockerkrig, men kan hjælpe os til at forstå nutidens bandekonflikter“. Information.
- ↑ Egli, Justin (19 júlí 2016). „The Danish state with a history of bikers, drugs & violence“. Dazed.
- ↑ Torben Benner (27. nóvember 2018). „34 år efter rockerdrab: Jønkes maskinpistol kommer på museum“. Politiken. Sótt 23. ágúst 2025.
- ↑ Facius, Jeppe; Mathiasen, Anders-Peter (22. maí, 2002). „Sådan skød vi Høvding“. Ekstrabladet (danska).
- ↑ Jette Landberg (24. október 2017). „Bullshit af Camilla Stockmann og Janus Køster-Rasmussen“. Litteratursiden.
- ↑ Anette Hyllested (19. apríl 2024). „Makrellen levede stærkt og døde ung: Fem stjerner til fængslende ny dansk tv-serie“. AvisenDanmark.