Akthelia

Akthelia Pharmaceuticals er íslenskt lífvísindafyrirtæki sem þróar ný lyf sem verja slímhúð í meltingarvegi fyrir skemmdum og fylgikvillum sem fylgja krabbameins- og stofnfrumumeðferð.

Fyrirtækið var stofnað af Guðmundi Hrafni Guðmundssyni, Eiríki Steingrímssyni, Roger Strömberg og Birgittu Agerberth sem öll eru prófessorar við Karolinska Institutet í Svíþjóð eða við Háskóla Íslands. Akthelia vinnur að þróun lyfja sem byggja á einkaleyfisvörðum efnaflokkum sem örva meðfædda ónæmiskerfið og hafa jafnframt bólgueyðandi áhrif.

Starfsemi

Krabbameins- og stofnfrumumeðferðir hafa alvarlegar aukaverkanir, meðal annars sem tengjast meltingarveginum. Meginverkefni Akthelia snýr að þróun lyfja til að verja slímhúð í meltingarvegi fyrir skemmdum og fylgikvillum sem fylgja slíkum meðferðum. Markmiðið er að minnka eða koma í veg fyrir sársauka, bólgur, sýkingar, og jafnvel andlát sjúklinga og auka lífsgæði þeirra.

Fyrirtækið vinnur einnig að verkefnum á sviði sýkinga og sárameðferðar, meðal annars fyrir sár hjá sykursjúkum. Fyrirtækið er enn á forskoðunarstigi og lyf þess hafa ekki hafið klínískar rannsóknir á mönnum.

Saga

Upphaf Akthelia byggist á áratuga rannsóknum á varnarefnasameindum og meingerð sem tengist truflun á varnarlagi þekju- og slímhimnuvefs. Í upphafi byggði starfsemin á rannsóknum á áhrifum stuttra fitusýra á slímhúð. Þessar rannsóknir leiddu til uppgötvunar nýrra sameinda sem gætu nýst í lyf.

Árangur og viðurkenningar

Akthelia Pharmaceuticals hefur hlotið fjármögnun og viðurkenningar fyrir rannsóknir á nýjum lyfjum gegn sýklalyfjaónæmi og þróun lyfja sem styðja eðlileg varnarkerfi líkamans. Fyrirtækið hefur hlotið styrki frá RANNÍS, Vísindasjóði Krabbameinsfélagsins og Evrópusambandinu. Fyrirtækið hefur einnig fengið viðurkenningar frá Evrópusambandinu fyrir framúrskarandi nýsköpun, meðal annars í formi viðurkenningarinnar European Commission Seal of Excellence.