Þéttbein
Þéttbein er, eins og nafnið bendir til, þétt, en líka hart. Þéttbeinið er búið til úr örlitlum samfelldum og sammiðja spólum sem nefnast beinflögur (e. lamella). Milli þessara beinflagna eru beinfrumurnar, hinar þroskuðu frumur beinvefjarins, og liggja þar í örgöngum sem nefnast lón (e. canaliculi).
Flögunum er raðað í samlæga hringi utan um miðlægan gang sem kallast Haversgangur (e. Haversian canal). Margar flögur mynda saman einingu sem kallast beinungur (e. osteon).
Helstu frumur sem finna má í þéttbeini eru:
- Beinfrumur (e. osteocytes) - sem viðhalda beinvefnum
- Beinmyndunarfrumur (e. osteoblasts) - sem mynda beinvef
- Beinstofnfrumur (e. osteoprogenitor/osteogenic cells) - forverufrumur beinfruma og beinmyndunarfrumna
- Beinætur (e. osteoclasts) - brjóta niður beinvef
Þéttbeinið er að mestu utan til í beininu þar sem sterkan vef þarf.
