Íþróttafélagið Þór Vestmannaeyjum

Úr Wikipediu, frjálsa alfræðiritinu
Jump to navigation Jump to search
Íþróttafélagið Þór
Þór logo.jpg
Fullt nafn Íþróttafélagið Þór
Gælunafn/nöfn Þórarar
Stytt nafn ÞÓR
Stofnað 9. september 1913
Sameinað ÍBV
Leikvöllur Þórsvöllur
Stærð
Heimabúningur
Útibúningur

Íþróttafélagið Þór var stofnað í Vestmannaeyjum 9. september 1913 af þrettán stofnfélögum í Þinghúsinu Borg á Heimagötu 3a í Vestmannaeyjum. Félagið notaðist við Hásteinsvöll til ársins 1937 en þá var tekin í notkun völlurinn við Botn við Friðarhöfn.

Saga[breyta | breyta frumkóða]

Bæði Knattspyrnufélag Vestmannaeyja og Ungmennafélag Vestmannaeyja virtust hafa misst mikinn kraft úr starfinu fljótlega í byrjun annars áratugar nítjándu aldar. Guðmundur Sigurjónsson var íþróttakennari frá Reykjavík og kom til Eyja gagngert til að halda námskeið fyrir unga fólkið í hinum ýmsu íþróttum. Guðmundur beitti sér fljótlega fyrir stofnun sérstaks íþróttafélags. Stofnfundur þessa nýja íþróttafélags var 9. september 1913 í Þinghúsinu. Stofnfélagar voru 13 og voru þar á meðal margir nafnkunnir menn í bæjarfélaginu. Markmið Þórs voru í upphafi að auka líkamlegan og andlegan mátt æskulýðs byggðarlagsins, bæði pilta og stúlkna.

Á stofnfundinum var félaginu gefið nafnið Þór, en alls komu sjö nafngiftir til greina. Ekki er getið í fundargerðarbókum hverjar hinar tillögurnar eru. Þá voru lög fyrir félagið samþykkt í 10 aðalgreinum. Í 2. gr. laganna segir: „Tilgangur félagsins er að iðka alls konar íþróttir og glæða áhuga manna á þeim.“ Fyrstu stjórn félagsins skipuðu þeir Georg Gíslason, formaður, Haraldur Eiríksson, féhirðir og Sigurður Jónsson, skósmiður í Péturshúsi, var ritari.

Tveimur dögum eftir aðalfund félagsins komu stofnfélagar saman til fundar. Á fundinum var tekin ákvörðun um að senda mann til Reykjavíkur til náms. Skyldi hann taka að sér íþróttakennslu félagsins þegar hann kæmi aftur heim. Haraldur Eiríksson, fyrrverandi rafvirkjameistari, var valinn til ferðarinnar. Strax um haustið 1913 byrjuðu íþróttaæfingar félagsins, en fyrsta árið var eingöngu um að ræða íslenska glímu, sem iðkuð var. Fljótlega varð starfsemi félagsins fjölbreyttari og knattspyrna, frjálsar íþróttir, sund og leikfimiæfingar voru einnig iðkaðar.

Gefið var út félagsblað á fyrstu árum Þórs og hét það Mjölnir. Fyrsta tölublaðið var lesið upp á félagsfundi 20. janúar 1919. Þá var stofnuð sérstök kvennadeild í handknattleik 9. desember 1929.[1]

Formenn Þórs[breyta | breyta frumkóða]

  • 1913-1918 Georg Gíslason frá Stakkagerði
  • 1919 Hjálmar Eiríksson
  • 1920-1923 Georg Gíslason frá Stakkagerði
  • 1924-1926 Guðmundur Helgason
  • 1927-1932 Georg Gíslason frá Stakkagerði
  • 1932-1942 Jón Ólafsson frá Garðhúsum
  • 1942-1949 Ingólfur Arnarson útgerðarmaður
  • 1949-1952 Kristján Georgsson Gíslasonar
  • 1952-1954 Ingólfur Arnarson útgerðarmaður
  • 1954-1958 Valtýr Snæbjörnsson frá Hergilsey

  • 1958-1959 Sveinn Tómasson Sveinssonar
  • 1959-1962 Sveinn Ársælsson Sveinssonar
  • 1962-1964 Axel Ó. Lárusson kaupmaður
  • 1964 Ólafur Sigurðsson
  • 1965-1967 Alexander Guðmundsson
  • 1967-1970 Jón Kr. Óskarsson
  • 1970-1972 Axel Ó. Lárusson kaupmaður
  • 1972-1975 Birgir Jóhannsson
  • 1975-1976 Sigurgeir Ólafsson
  • 1976-1977 Guðmundur Stefánsson

  • 1977-1979 Friðrik M. Sigurðsson
  • 1979-1985 Friðrik Karlsson
  • 1985-1996 Þór Ísfeld Vilhjálmsson

[2]

Þann 6. maí 1945 var ákveðið að öll félög úr Vestmannaeyjum myndu keppa undir merkjum ÍBV utan héraðs. Frá og með 1996 voru félögin Þór og Týr sameinuð undir merkjum ÍBV.[3]

Heimildir[breyta | breyta frumkóða]

  1. Þór Í. Vilhjálmsson: Íþróttafélagið Þór 70 ára. 70 ára afmælisrit Íþróttafélagsins Þórs. 1983
  2. Íþróttafélagið Þór. Heimaslóð.
  3. Þór Í. Vilhjálmsson: Íþróttafélagið Þór 70 ára. 70 ára afmælisrit Íþróttafélagsins Þórs. 1983.