William Shakespeare
Úr Wikipediu, frjálsa alfræðiritinu
William Shakespeare (26. apríl 1564 – 23. apríl 1616) var enskur leikari, leikskáld og ljóðskáld. Hann samdi um 38 leikrit, 154 sonnettur og önnur ljóð. Leikrit hans náðu töluverðum vinsældum meðan hann lifði og eftir að hann lést varð hann smám saman mikilvægari í samhengi bókmennta á ensku og nú á dögum er ekki óalgengt að hann sé kallaður mesti rithöfundur á enskri tungu fyrr og síðar. Hann hefur jafnan verið kallaður þjóðskáld Englendinga eða „hirðskáldið“ (the bard).
Leikritunarferli Shakespeares er stundum skipt í þrjá meginhluta; fyrstu gamanleikina og sögulegu leikritin (t.d. Draumur á Jónsmessunótt og Hinrik IV, 1. hluti), miðtímabilið þegar hann skrifar flesta frægu harmleikina (eins og Rómeó og Júlía, Óþelló, Makbeð, Hamlet og Lé konung) og seinni rómönsurnar (Vetrarævintýri og Ofviðrið). Mörg af leikritunum eru endurgerðir eldri leikrita líkt og þá tíðkaðist.
[breyta] Íslenskar þýðingar
Ýmsir hafa fengist við að þýða Shakespeare á íslensku, meðal annars Matthías Jochumsson og Steingrímur Thorsteinsson. Helgi Hálfdánarson er sá eini sem hefur þýtt öll leikrit Shakepeares og telja margir þýðingar hans einstakar. Helgi viðheldur stakhendu (blank verse) frumtextans, en notast auk þess einnig við stuðla í hverri línu, en sumstaðar við stuðla og höfuðstaf.
[breyta] Tenglar
- Vísindavefurinn: „Hvert er aðalhlutverkið í Draumi á Jónsmessunótt eftir Shakespeare?“
- Shakespeare-þýðingar; grein í Lesbók Morgunblaðsins 1956
- Shakespeare, villta vestrið og íslenskir sveitmenn; grein í Lesbók Morgunblaðsins 1999
- Leikrit Shakespeares á íslenzku; grein í Lesbók Morgunblaðsins 1966
