Ólöf Nordal

Ólöf Nordal (ÓN)
Ólöf Nordal
Fæðingardagur:	3. desember 1966 (1966-12-03)
Fæðingarstaður:	Reykjavík
2. þingmaður Reykjavíkurkjördæmis suður
Flokkur:	Sjálfstæðisflokkurinn
Nefndir:	Allsherjarnefnd, samgöngunefnd og umhverfisnefnd
Þingsetutímabil
2007-2009	í Norðaust. fyrir Sjálfstfl. ✽
2009	í Norðaust. fyrir Sjálfstfl.
2009-	í Rvk. s. fyrir Sjálfstfl.
✽ = stjórnarsinni
Tenglar
Æviágrip á vef Alþingis – Vefsíða

Ólöf Nordal, hdl. (f. 3. desember 1966) er varaformaður Sjálfstæðisflokksins og oddviti í Reykjavíkurkjördæmi suður. Hún var kjörin á Alþingi fyrir Norðausturkjördæmi í alþingiskosningunum 2007 en gaf kost á sér í Reykjavík í kosningunum 2009.

Ólöf var kjörin varaformaður Sjálfstæðisflokksins á landsfundi 26. júní 2010.

Faðir hennar er Jóhannes Nordal, fyrrverandi bankastjóri Seðlabanka Íslands og móðir hennar er Dóra Nordal, píanóleikari og húsmóðir. Eiginmaður Ólafar er Tómas Már Sigurðsson, forstjóri Alcoa á Íslandi og eiga þau fjögur börn; Sigurð 1991, Jóhannes 1994, Herdísi 1996 og Dóru 2004.

Menntun

Ólöf varð stúdent frá Menntaskólanum í Reykjavík 1986, lauk lögfræðiprófi við Háskóla Íslands 1994 og fékk málflutningsréttindi fyrir Héraðsdómi árið 1999. Árið 2002 útskrifaðist hún með MBA-próf frá Háskólanum í Reykjavík. Ólöf hefur sótt ýmis námskeið á sviði lögfræði, afbrotafræði og réttarsögu, meðal annars við Cornell-háskóla í Bandaríkjunum. Einnig hefur hún sótt ýmis námskeið á sviði stjórnsýslu og fjármála.

Starfsferill

Ólöf starfaði í lögfræðideild Landsbanka Íslands 1995-1996. Hún var deildarstjóri í samgönguráðuneytinu 1996-1999. Lögfræðingur hjá Verðbréfaþingi Íslands 1999-2001. Stundakennari í lögfræði við Háskólann á Bifröst 1999-2002 og vann að stofnun lagadeildar við skólann. Deildarstjóri lagadeildar við Háskólann á Bifröst 2001-2002. Yfirmaður heildsöluviðskipta hjá Landsvirkjun 2002-2004. Framkvæmdastjóri sölusviðs hjá RARIK 2004-2005 og framkvæmdastjóri Orkusölunnar 2005-2006. Ólöf hefur einnig unnið við þýðingar og þýddi bókina Sjáðu barnið eftir Desmond Morris, sem var gefin út af Almenna bókaforlaginu árið 1993.

Trúnaðarstörf

Á Alþingi hefur Ólöf gegnt margvíslegum trúnaðarstörfum, meðal annars verið varaformaður samgöngunefndar, setið í allsherjarnefnd og umhverfisnefnd. Hún situr í háskólaráði Háskólans á Akureyri, stjórn Handverks og hönnunar, er formaður nefndar á vegum fjármálaráðuneytis um kynbundinn launamun og fleira. Hún hefur setið í ýmsum nefndum í tengslum við störf sín, meðal annars á sviði fjármálamarkaða, og er formaður nefndar á vegum fjármálaráðuneytis, sem hefur það að markmiði að draga úr kynbundum launamuni hjá hinu opinbera.

Tenglar

• Ég býð fram krafta mína, lesendagrein eftir Ólöfu í Morgunblaðinu 25. nóvember 2006

Fyrirrennari: Þorgerður Katrín Gunnarsdóttir

Varaformaður Sjálfstæðisflokksins (26. júní 2010 – enn í embætti)

Eftirmaður: enn í embætti