Bjarni Benediktsson (f. 1970)

Bjarni Benediktsson (BjarnB)
Fæðingardagur:	26. janúar 1970 (1970-01-26)
Fæðingarstaður:	Reykjavík
2. þingmaður Suðvesturkjördæmis
Flokkur:	Sjálfstæðisflokkurinn
Nefndir:	Utanríkismálanefnd og Íslandsdeild Norðurlandaráðs
Þingsetutímabil
2003-2009	í Suðvest. fyrir Sjálfstfl. ✽
2009-	í Suðvest. fyrir Sjálfstfl.
✽ = stjórnarsinni
Embætti
2003-2007	Formaður allsherjarnefndar
2003-2005	Formaður Íslandsdeildar VES-þingsins
2007-2009	Formaður utanríkismálanefndar
Tenglar
Æviágrip á vef Alþingis – Vefsíða

Bjarni Benediktsson (f. 26. janúar 1970) er íslenskur lögfræðingur og formaður Sjálfstæðisflokksins og oddviti flokksins í Suðvesturkjördæmi frá árinu 2009. Bjarni hefur fjórum sinnum haft betur gegn meðframbjóðanda á landsfundum Sjálfstæðisflokksins. Hann hefur verið umdeildur fyrir þáttöku sína í viðskiptalífinu áður en hann varð formaður Sjálfstæðisflokksins.

Hvað stefnu Bjarna í utanríkismálum varðar er hann yfirlýstur stuðningsmaður samvinnu við Bandaríkin, hann hefur lýst yfir vilja „til þess að efla enn frekari tengsl þessara vinaþjóða í framtíðinni. Ný tækifæri og nýjar áskoranir, hvort sem er í viðskiptum milli landanna, ferðamennsku, menningar- og menntamálum, öryggis- og varnarmálum eða málefnum tengdum norðurskautinu eiga að vera okkur hvatning til þess að styrkja böndin enn frekar.“ Bjarni hefur lýst því yfir að hann styðji ekki sjálfstæði Palestínu.

Menntun

Bjarni útskrifaðist úr Menntaskólanum í Reykjavík árið 1989, lauk námi í lögfræði frá Háskóla Íslands 1995, stundaði nám í þýsku og lögfræði í Þýskalandi 1995 – 1996, LL.M.-gráða (e. Master of Laws) frá Háskólanum í Miami í Bandaríkjunum 1997 og varð löggiltur verðbréfamiðlari árið 1998. Hann starfaði sem fulltrúi sýslumannsins í Keflavík árið 1995 og sem lögfræðingur Eimskipafélags Íslands á árunum 1997 – 1999. Bjarni var lögmaður með eigin rekstur á Lex lögmannsstofu 1999 – 2003 og var faglegur framkvæmdastjóri Lex 2002 – 2003.

Þingstörf

Bjarni hefur setið á Alþingi fyrir Suðvesturkjördæmi frá árinu 2003. Bjarni var formaður allsherjarnefndar Alþingis á árunum 2003 – 2007 og formaður utanríkismálanefndar á árunum 2007 – 2009. Hann sat í stjórnarskrárnefnd af hálfu flokksins á árunum 2004 – 2007 og ennfremur árið 2009.

Bjarni sat í fjárlaganefnd Alþingis 2003 – 2007, var í iðnaðarnefnd á árunum 2003 – 2004, heilbrigðis- og trygginganefnd 2004 – 2005, utanríkismálanefnd 2005-2009 og efnahags- og skattanefnd frá 2007. Bjarni var formaður Íslandsdeildar VES-þingsins 2003 – 2005 og hefur setið í Íslandsdeild þingmannanefndar EFTA frá 2005. Hefur setið í fjölda nefnda á vegum ráðuneyta, svo sem nefnd um ytri endurskoðun laganáms við Háskóla Íslands, nefnd um endurskoðun laga um ríkisborgararétt og nefnd um endurskoðun jafnréttislaga.

Viðskiptalíf

Bjarni Benediktsson var stjórnarformaður N1 og BNT á árunum 2005 – 2008. Hann lét af stjórnarformennsku eftir bankahrunið á Íslandi haustið 2008 vegna þess að hann taldi fulla þörf á að helga stjórnmálum alla krafta sína.

Í byrjun desember 2009 skýrði DV frá því að Bjarni hefði í febrúar 2008 skrifað undir samning í umboði eigenda félagsins Vafnings. Viðskiptafléttan sem um ræðir er flókin. Hún fólst í því að félagið Vafningur fékk lánaða 10,5 milljarða króna til þess að endurfjármagna félagið Þáttur International sem var í eigu Milestone og bræðranna Einars og Benedikts Sveinssona. Benedikt er faðir Bjarna. Bjarni sjálfur hefur sagt aðkomu sína hafa verið „fólgin í því að veita Glitni veð í hlutafélaginu Vafningi til tryggingar á láni sem Glitnir hafði veitt því. Aðra aðkomu að málinu hafði ég ekki“. Í umfjöllun DV er haldið fram að Þáttur International hafi með þessum hætti greitt 15 milljarða króna skuld við bandaríska bankann Morgan Stanley og varnaði því að bandaríski bankinn hafi leyst til sín 7% hlut félagsins í Glitni. Fram hafa komið ásakanir um að Bjarni hafi með þessu gerst sekur um ólögleg viðskipti en hann hefur ekki verið kærður.

Formennska í Sjálfstæðisflokknum

Bjarni var kjörinn formaður Sjálfstæðisflokksins á landsfundi 29. mars 2009, er Geir H. Haarde hvarf af vettvangi stjórnmála. Hann tilkynnti um formannsframboð sitt, eftir að Geir tilkynnti um ákvörðun sína að hætta, 31. janúar. Bjarni sigraði Kristján Þór Júlíusson í formannskjörinu. Bjarni hlaut 990 atkvæði, tæp 60%, en Kristján Þór 688, tæp 40%. Aðrir fengu minna. Þrír aðrir höfðu lýst yfir áhuga á formannssætinu.

Stuttu eftir að Bjarni hafði verið kosinn til formennsku í Sjálfstæðisflokknum bárust fréttir um það í fjölmiðlum að Sjálfstæðisflokkurinn hefði tekið á móti styrkjum frá FL Group (sem heitir Stoðir í dag) og Landsbanka Íslands upp á samtals 50 milljónir króna. Þetta mál var nefnt Styrkjamálið, Bjarni taldi alla ábyrgð vera á þáverandi framkvæmdastjórum flokksins sem hefðu samkvæmt honum átt að vita af styrkjunum, þá Kjartan Gunnarsson og Andra Óttarsson. Hann dró síðar til baka ummæli sín og sagði fráleitt að draga nafn Kjartans í atburðarrásina, hann hefði ekkert haft með þessi mál tengd styrkjum að gera.

Bjarni var endurkjörinn formaður á landsfundi 26. júní 2010. Bjarni hlaut 573 atkvæði í kjörinu eða 62% greiddra atkvæða en Pétur H. Blöndal alþingismaður fékk 281 atkvæði eða 30%. Alls greiddu 925 atkvæði í kjörinu en auðir seðlar voru 50. Aðrir hlutu færri atkvæði.

Á landsfundi Sjálfstæðisflokksins sem haldinn var 17.-20. nóvember 2011 bauð Hanna Birna Kristjánsdóttir sig fram til formanns gegn Bjarna. Bjarni hlaut 727 af 1323 greiddum atkvæðum. Hann hlaut því 55 prósent kosningu. Hanna Birna fékk 577 atkvæði og rúmlega 44 prósent atkvæða. Á landsfundi 2013 var hann svo kjörinn með tæplega 80% atkvæða.

Einkalíf

Eiginkona Bjarna er Þóra Margrét Baldvinsdóttir. Þau búa í Garðabænum í einbýlishúsi og eiga saman fjögur börn. Meðal áhugamála Bjarna er fótbolti.

Tenglar

• Vefsíða Bjarna
• Lánasafn nýju bankanna afar lélegt
• Bjarni vill afnema verðtrygginguna
• Bjarni talar um tengsl sín við viðskiptalífið
• Kom ekki nálægt fasteignabraskinu
• Um ætt Bjarna í DV
• Stendur ekki til að yfirheyra Bjarna; af Vísi.is 25. jan. 2010
• Stóra plottið: Bjarni og félagar söfnuðu 45 milljörðum
• Bjarni Ben í braski: Veðsetti bréfin í Vafningi (Myndir)
• Bjarni Ben: Turninn í Makaó innlegg Wernersbræðra
• Bjarni: Stýrði og átti í BNT en segir Vafning ekki koma sér við
• Dómgreind mín brást ekki, Rúv.is 14. febrúar 2012
• Tap Sjóvár kostar þig 16 þúsund krónur. Dv.is 12. ágúst 2012

Fyrirrennari: Geir H. Haarde

Formaður Sjálfstæðisflokksins (29. mars 2009 – )

Eftirmaður: enn í embætti

  Þetta æviágrip sem tengist stjórnmálum er stubbur. Þú getur hjálpað til með því að bæta við greinina.